ஹாங்காங் ஓபன் பேட்மிண்டன் போட்டி அங்குள்ள கோலூன் நகரில் நடந்து வருகிறது. இதில் நேற்று நடந்த ஆண்கள் ஒற்றையர் முதலாவது சுற்று ஆட்டம் ஒன்றில் இந்திய வீரர் பிரியன்ஷூ ரஜாவத் 13-21, 14-21 என்ற நேர்செட்டில் ஜப்பானின் கன்டா சுனியமாவிடம் தோல்வி கண்டு வெளியேறினார். மற்றொரு ஆட்டத்தில் சீன தைபேயின் சு லி யங்கை எதிர்த்து களம் இறங்க இருந்த இந்திய வீரர் லக்ஷயா சென் கடைசி நேரத்தில் விலகினார்.

பெண்கள் பிரிவில் இந்திய வீராங்கனை மாள்விகா பன்சோத் 14-21, 12-21 என்ற நேர்செட்டில் சீனாவின் ஜாங் யி மானிடம் பணிந்தார். மற்றொரு ஆட்டத்தில் இந்தியாவின் ஆகர்ஷி காஷ்யப் 18-21, 10-21 என்ற நேர்செட்டில் ஜெர்மனியின் யோனி லியிடம் வீழ்ந்தார். இதன் மூலம் ஒற்றையர் பிரிவில் இந்தியாவின் சவால் முடிவுக்கு வந்தது.