பாரீஸ்,

கிராண்ட்ஸ்லாம் என்ற உயரிய அந்தஸ்து பெற்ற பிரெஞ்ச் ஓபன் டென்னிஸ் தொடர் பாரீஸ் நகரில் நேற்று தொடங்கியது. களிமண் தரையில் நடக்கும் இந்த போட்டியில் ஆண்கள் ஒற்றையர் முதல் சுற்று ஆட்டம் ஒன்றில் தரவரிசையில் 12-வது இடம் வகிக்கும் டேவிட் கோபின் (பெல்ஜியம்) அதிர்ச்சி தோல்வி அடைந்தார். அவரை 74-ம் நிலை வீரர் 19 வயதான ஜானிக் சின்னெர் (இத்தாலி) 7-5, 6-0, 6-3 என்ற செட் கணக்கில் தோற்கடித்தார்.

மற்றொரு ஆட்டத்தில் முன்னாள் சாம்பியன் வாவ்ரிங்கா (சுவிட்சர்லாந்து) 6-1, 6-3, 6-2 என்ற நேர் செட்டில் ஒலிம்பிக் சாம்பியன் ஆன்டி முர்ரேவை (இங்கிலாந்து) விரட்டினார். நிஷிகோரி (ஜப்பான்), ஜான் இஸ்னர் (அமெரிக்கா) ஆகியோரும் முதல் தடையை வெற்றிகரமாக கடந்தனர்.

பெண்கள் ஒற்றையர் பிரிவில் 2-ம் நிலை வீராங்கனை சிமோனா ஹாலெப் (ருமேனியா), சாரா சோரிப்ஸ் டோர்மோவை (ஸ்பெயின்) புதிதாக மேற்கூரை அமைக்கப்பட்ட களத்தில் எதிர்கொண்டார். தொடக்கத்தில் 2-4 என்று பின்தங்கிய ஹாலெப் அதன் பிறகு தொடர்ச்சியாக 10 கேம்களை வசப்படுத்தி அசத்தினார். முடிவில் ஹாலெப் 6-4, 6-0 என்ற நேர் செட்டில் சோரிப்சை தோற்கடித்து 2-வது சுற்றுக்கு முன்னேறினார். அவர் தொடர்ச்சியாக ருசித்த 15-வது வெற்றி இதுவாகும். ஹாலெப் நேற்று தனது 29-வது பிறந்த நாளை கொண்டாடினார். பிறந்த நாள் பரிசாக இந்த வெற்றி அமைந்தது.

இதே போல் முன்னாள் நம்பர் ஒன் வீராங்கனை விக்டோரியா அஸரென்கா (பெலாரஸ்) தன்னை எதிர்த்த டான்கா கோவினிச்சை (மோன்ட்னெக்ரோ) 6-1, 6-2 என்ற நேர் செட்டில் பந்தாடினார். எலிஸ் மெர்டென்ஸ் (பெல்ஜியம்), மரியா சக்காரி (கிரீஸ்), கனேபி (எஸ்தோனியா) ஆகியோரும் முதல் சுற்றில் வெற்றி கண்டனர்.

அதே சமயம் முன்னாள் நம்பர் ஒன் வீராங்கனை வீனஸ் வில்லியம்ஸ் (அமெரிக்கா) 4-6, 4-6 என்ற நேர் செட்டில் கரோலினா ஸ்கிமிட்லோவாவிடம் (சுலோவக்கியா) வீழ்ந்தார்.