மியாமி,

மியாமி சர்வதேச டென்னிஸ் போட்டி அமெரிக்காவின் புளோரிடா மாகாணத்தில் உள்ள மியாமி நகரில் நேற்று தொடங்கியது. ஏப்ரல் 1-ந் தேதி வரை நடைபெறும் இந்த போட்டியின் ஆண்கள் ஒற்றையர் பிரிவு தகுதி சுற்றின் 2-வது ஆட்டத்தில் உலக தரவரிசையில் 107-வது இடத்தில் இருக்கும் இந்திய வீரர் யுகி பாம்ப்ரி, தரவரிசையில் 133-வது இடத்தில் உள்ள இலியாஸ் மெர்ரை (சுவீடன்) எதிர்கொண்டார். இதில் யுகி பாம்ப்ரி 7-5, 6-2 என்ற நேர்செட்டில் இலியாஸ் மெர்ரை தோற்கடித்து பிரதான சுற்றுக்கு தகுதி பெற்றார். முன்னதாக நடந்த முதலாவது ஆட்டத்தில் யுகி பாம்ப்ரி, உலக தரவரிசையில் 75-வது இடத்தில் உள்ள மிர்சா பாசிச்சை (போஸ்னியா) வீழ்த்தி இருந்தார். பிரதான சுற்றின் முதல் ஆட்டத்தில் யுகி பாம்ப்ரி, உலக தரவரிசையில் 11-வது இடத்தில் இருக்கும் அமெரிக்க வீரர் ஜாக் சோக்கை சந்திக்கிறார்.