புதுடெல்லி,
நாடாளுமன்ற மக்களவையில் மத்திய நிதி மந்திரி நிர்மலா சீதாராமன் நேற்று தாக்கல் செய்த மத்திய பட்ஜெட்டில் மாநிலங்களுக்கு மகிழ்ச்சி தரும் அறிவிப்பை வெளியிட்டார்.
இது தொடர்பாக அவர் பேசும் போது கூறியதாவது:-
மாநிலங்களுக்கு மத்திய அரசு வழங்குகிற 50 ஆண்டு கால வட்டியில்லா கடன் வசதி, மேலும் ஓராண்டுக்கு நீட்டிக்கப்படுகிறது. இந்த வட்டியில்லா கடனை அடுத்த நிதி ஆண்டுக்குள் 2023-24 மூலதனத்தில் செலவிட வேண்டும். இதில் பெரும்பாலான செலவுகள் மாநிலங்களின் விருப்பப்படி அமையும். ஆனால், அதன் ஒரு பகுதி, மாநிலங்கள் தங்கள் உண்மையான மூலதனத்தை அதிகரிக்க வேண்டும் என்பது நிபந்தனையாக இருக்கும்.
நிபந்தனைகள்
வட்டியில்லா கடனை கீழ்க்கண்ட விதங்களில் பயன்படுத்த வேண்டும்.
* பழைய அரசு வாகனங்களை ஒழித்துக்கட்ட வேண்டும்.
* நகர்ப்புற திட்டமிட்டல், சீர்திருத்தங்கள் மற்றும் நடவடிக்கைகள்.
* நகர்ப்புற உள்ளாட்சி அமைப்புகளில் நிதி சீர்திருத்தங்களை உருவாக்குதல்
* போலீசாருக்கு வீட்டு வசதிகளை ஏற்படுத்துதல்
* யூனிட்டி மால்களை கட்டுதல்
* குழந்தைகள் மற்றும் வளரும் தலைமுறையினருக்கு நூலகங்கள், டிஜிட்டல் கட்டமைப்புகளை ஏற்படுத்துதல்
* மத்திய அரசின் மூலதன செலவினங்களில் மாநிலங்களின் பங்குக்காக செலவிடலாம்.
இவ்வாறு நிதி மந்திரி நிர்மலா சீதாராமன் கூறினார்.