சென்னை,
தெலுங்கு திரையுலகில் தற்போது பிரபலமாகி வரும் நடிகைகளில் ஒருவர் வைஷ்ணவி சைதன்யா. ஒரே ஒரு படத்தின் மூலம் ஒரே இரவில் நட்சத்திரமாக மாறிய இவர் , தற்போது, தெலுங்கில் அடுத்தடுத்து படங்களில் நடித்து வருகிறார்.
''பேபி'' படத்தின் மூலம் கதாநாயகியாக அறிமுகமானவர் வைஷ்ணவி சைதன்யா. ஆனந்த் தேவரகொண்டா கதாநாயகனாக நடித்த இந்தப் படம் பிளாக்பஸ்டர் ஹிட்டானது. இந்தப் படத்தின் மூலம் வைஷ்ணவி சைதன்யா ஒரே இரவில் நட்சத்திரமானார்.
இப்படத்தின் மூலம் கதாநாயகி அந்தஸ்தைப் பெற்ற வைஷ்ணவிக்கு, தெலுங்கில் தொடர் வாய்ப்புகள் கிடைத்தன. பேபிக்கு பிறகு, லவ் மீ மற்றும் ஜாக் போன்ற படங்களில் நடித்து கவனத்தை ஈர்த்தார். தற்போது, அவர் பிஸியாக இருக்கிறார்.
இந்நிலையில், பேபி படத்திற்கு முன்பு ஒரு பிளாக்பஸ்டர் பட வாய்ப்பை இழந்திருக்கிறார் வைஷ்ணவி சைதன்யா. பேபி படத்திற்கு முன்பு அவர் இரண்டு படங்களுக்கு ஒப்பந்தத்தில் கையெழுத்திட்டிருந்தார்.
அவற்றில் ஒன்று பாலகம். எந்த எதிர்பார்ப்பும் இல்லாமல் வெளியாகி மிகப்பெரிய வெற்றியைப் பெற்ற இந்தப் படம், பல தேசிய மற்றும் சர்வதேச விருதுகளை வென்றது. இப்படத்தில் வைஷ்ணவி சைதன்யா ஆரம்பத்தில் கதாநாயகியாக நடிக்க இருந்தநிலையில் கால்ஷீட் முரண்பாடுகள் காரணமாக அவரால் நடிக்கமுடியாமல் போயுள்ளது. இறுதியில் நடிகை காவ்யா கல்யாண்ராமுக்கு அந்த வாய்ப்பு கிடைத்தது.
வைஷ்ணவி சைதன்யா பாலகம் படத்தில் நடிக்கத் தவறவிட்டாலும், 2023-ம் ஆண்டு வெளியான பிளாக்பஸ்டர் பேபி படத்தில் அவரது நடிப்பு அவருக்கு குறிப்பிடத்தக்க பாராட்டையும் வெற்றியையும் பெற்றுத் தந்தது.