சென்னை,
சென்னை வடபழனி முருகன் கோவிலில் ஒவ்வோர் ஆண்டும் பங்குனி மாதத்தில் லட்சார்ச்சனை மற்றும் தெப்பத் திருவிழா வெகு விமரிசையாக நடந்து வருகிறது. அந்தவகையில், இந்த ஆண்டு பங்கு உத்திரத்தையொட்டி லட்சார்ச்சனை திருவிழா கடந்த மாதம் 29-ந்தேதி தொடங்கியது.
விழாவில் முக்கிய நிகழ்வான தெப்பத் திருவிழா நேற்று தொடங்கியது. நேற்று அதிகாலையில் கோவில் நடை திறக்கப்பட்டு முருகனுக்கு சிறப்பு அபிஷேகம், அலங்காரம் செய்யப்பட்டது. இரவு 7 மணி அளவில் நடந்த முதல்நாள் தெப்பத்தில் முருகப்பெருமான் எழுந்தருளி திருக்குளத்தில் வலம் வந்து பக்தர்களுக்கு அருள்பாலித்தார். இதில் திரளான பக்தர்கள் கலந்துகொண்டு தரிசனம் செய்தனர்.
இரண்டாம் நாள் தெப்பத்திருவிழா இன்று (வெள்ளிக்கிழமை) இரவு 7 மணி அளவில் நடக்கிறது. தெப்பத்தில் வள்ளி, தெய்வானையுடன் சண்முகர் எழுந்தருள்கிறார். 3-ம் நாளான நாளை (சனிக்கிழமை) தெப்பத்தில் வள்ளி தெய்வானையுடன் சுப்ரமணிய சுவாமி எழுந்தருளி பக்தர்களுக்கு அருள்பாலிப்பார்.
விழா வருகிற 4-ந்தேதி வரை நடக்கிறது. விழாவையொட்டி கோவிலில் யாகங்களும், ஆறுகால பூஜைகளும் தினசரி நடக்கின்றன. விழாவில் ஏராளமான பக்தர்கள் கலந்துகொண்டு சாமி தரிசனம் செய்வார்கள் என்பதால், அங்கு ஏராளமான போலீசார் பாதுகாப்பு பணியில் ஈடுபட்டுள்ளனர்.
