கிருஷ்ணகிரி,
கிருஷ்ணகிரி அருகே உள்ள சுண்டேகுப்பம் பகுதியை சேர்ந்தவர் லட்சுமணமூர்த்தி (வயது 45). இவர் கிருஷ்ணகிரி கே.ஆர்.பி. அணையில் வேலை பார்த்து வருகிறார். அவருடன், அதே பகுதியை சேர்ந்த திம்மரசன் (41) என்பவரும் வேலை பார்த்து வருகிறார். நேற்று முன்தினம் மாலை 2 பேரும் பணியில் இருந்தனர்.
அப்போது 4 பேர் மோட்டார் சைக்கிளில் அங்கு வந்தனர். அவர்களிடம் அணை பூங்காவை சுற்றி பார்க்க நுழைவு சீட்டு கட்டணத்தை லட்சுமணமூர்த்தியும், திம்மரசனும் கேட்டனர். இது தொடர்பாக அந்த 4 பேருக்கும், ஊழியர்களுக்கும் இடையே வாக்குவாதம் ஏற்பட்டது. பின்னர் ஆத்திரம் அடைந்த அந்த 4 பேரும் லட்சுமணமூர்த்தியையும், திம்மரசனையும் சரமாரியாக தாக்கினார்கள். இதில் காயம் அடைந்த அவர்கள் 2 பேரும் சிகிச்சைக்காக கிருஷ்ணகிரி அரசு ஆஸ்பத்திரியில் அனுமதிக்கப்பட்டனர்.
4 பேர் கைது
இதுதொடர்பாக லட்சுமணமூர்த்தி கொடுத்த புகாரின் பேரில் கிருஷ்ணகிரி அணை போலீசார் வழக்குப்பதிவு செய்து கிருஷ்ணகிரி கீழ்சோமார்பேட்டையை சேர்ந்த அரவிந்தன் (20), மேல்சோமார்பேட்டையை சேர்ந்த பிரசாந்த் (22), வெங்கடேசன் (25), மதுரை பழங்கானத்தை சேர்ந்த ஜெயமூர்த்தி (21) ஆகிய 4 பேரை போலீசார் கைது செய்தனர்.
