ஆலந்தூர்,
தமிழகத்தில் கொரோனா 2-வது அலை வேகமாக பரவி வருகிறது. எனவே மத்திய மருந்து தொகுப்பில் இருந்து தமிழகத்துக்கு கூடுதலாக தடுப்பூசிகளை வழங்க வேண்டும் என மத்திய அரசுக்கு, தமிழக முதல்-அமைச்சர் மு.க.ஸ்டாலின் கோரிக்கை வைத்தார். அதன்படி மத்திய மருந்து சேமிப்பு கிடங்கில் இருந்து கோவிஷீல்டு மற்றும் கோவக்சின் தடுப்பூசி மருந்துகள் தமிழகத்துக்கு அனுப்பப்பட்டு வருகிறது.
இந்தநிலையில் புனேவில் இருந்து 50 பார்சல்களில் 6 லட்சம் கோவிஷீல்டு கொரோனா தடுப்பூசி மருந்துகள் சென்னைக்கு வந்தன. கொரோனா தடுப்பூசிகளை தமிழக சுகாதார அதிகாரிகள் கன்டெய்னர் மூலமாக சென்னையில் உள்ள மருத்துவ தலைமை கிடங்கிற்கு கொண்டு சென்றனர். அங்கிருந்து பிற மாவட்டங்களுக்கு பிரித்து அனுப்பப்படும் என அதிகாரிகள் தெரிவித்தனர்.