கிருஷ்ணகிரி,
தமிழக அரசின் இந்து சமய அறிநிலையத்துறையில் செயல் அலுவலர் (கிரேடு -3) பதவியில் காலியாக உள்ள பணியிடங்களுக்கு தமிழ்நாடு அரசு தேர்வாணையம் போட்டி தேர்வு மூலம் நிரப்பப்பட உள்ளன. இந்த இரண்டு பணிகளுக்கும் எழுத்து தேர்வு, நேர்முக தேர்வு அடிப்படையில் பணி நியமனம் நடைபெறுகிறது.
இந்த நிலையில் நேற்று செயல் அலுவலருக்கான (கிரேடு-3) எழுத்து தேர்வு தமிழகம் முழுவதும் நடந்தது. கிருஷ்ணகிரி மாவட்டத்தில் இந்த தேர்வை எழுத 1,626 பேர் விண்ணப்பித்திருந்தனர்.
நேற்று கிருஷ்ணகிரியில் அரசு ஆண்கள் மேல்நிலைப்பள்ளி, அரசு மகளிர் மேல்நிலைப்பள்ளி, விஜய் வித்யாலயா மெட்ரிக் மேல்நிலைப்பள்ளி ஆகிய 3 மையங்களில் தேர்வு நடந்தது. இந்த தேர்விற்காக விண்ணப்பித்த 1,626 பேரில், 856 பேர் மட்டுமே எழுதினார்கள். 770 பேர் தேர்வு எழுத வரவில்லை. இதே போல் இன்று (ஞாயிற்றுக்கிழமை) இந்து சமய அறநிலையத்துறையில் செயல் அலுவலர் (கிரேடு - 4)-க்கான எழுத்து தேர்வு அதே 3 மையங்களில் நடைபெறுகிறது. இதற்காக 1,776 பேர் விண்ணப்பித்துள்ளனர்.