திண்டுக்கல்,
கன்னிவாடி அருகே தருமத்துப்பட்டி சுரைக்காய்பட்டி கிராமம் உள்ளது. இங்கு சுமார் 200க்கும் மேற்பட்ட குடும்பத்தினர் வசித்து வருகின்றனர். இப்பகுதி மக்களுக்கு ஆழ்துளை கிணறு அமைக்கப்பட்டு சிறிய குடிநீர் தொட்டியில் ஏற்றப்பட்டு வினியோகம் செய்யப்பட்டு வருகிறது. ஆனால் வறட்சி காரணமாக ஆழ்துளை கிணற்றில் குறைந்தளவே தண்ணீர் இருக்கிறது.
இந்த தண்ணீர் அப்பகுதி மக்களுக்கு போதுமானதாக இல்லை. இதைத்தொடர்ந்து அப்பகுதி மக்கள் கடந்த சில மாதங்களுக்கு முன்பு போராட்டம் நடத்தினர். இதைத்தொடர்ந்து டி.கோம்பையில் உள்ள குளத்தில் கிணறு வெட்டப்பட்டு அப்பகுதிக்கு குழாய்கள் மூலம் தண்ணீர் கொண்டு செல்ல முடிவு செய்யப்பட்டது.
இதையடுத்து டி.கோம்பையில் இருந்து சுமார் 6 கி.மீ. தொலைவில் உள்ள சுரைக்காய்பட்டி கிராமத்துக்கு குழாய்கள் பதிக்கப்பட்டன. ஆனால் தரமற்ற குழாய்கள் பதித்ததாக பொதுமக்கள் குற்றம் சாட்டினர். மேலும் குழாய்கள் உடைப்பு ஏற்பட்டு குடிநீர் வினியோகம் பாதிக்கப்பட்டதாக கூறப்படுகிறது. எனவே அப்பகுதி மக்களுக்கு குடிநீர் வினியோகம் பாதிக்கப்பட்டதாக கூறப்படுகிறது.
இதனால் ஆத்திரம் அடைந்த அப்பகுதி மக்கள் 200க்கும் மேற்பட்டோர் செம்பட்டி ஒட்டன்சத்திரம் சாலையில் திடீரென காலிக்குடங்களுடன் மறியலில் ஈடுபட்டனர். இதனால் அந்த பகுதியில் போக்குவரத்து பாதிக்கப்பட்டது. சில பெண்கள் சாலையில் படுத்து போராட்டத்தில் ஈடுபட்டனர்.
இதுகுறித்து தகவல் அறிந்ததும் ஒட்டன்சத்திரம் போலீஸ் துணை சூப்பிரண்டு ஆறுமுகம், கன்னிவாடி போலீஸ் இன்ஸ்பெக்டர் கோட்டைச்சாமி ஆகியோர் தலைமையில் போலீசார் சம்பவ இடத்துக்கு விரைந்து வந்தனர். அதுமட்டுமின்றி ரெட்டியார்சத்திரம் வட்டார வளர்ச்சி அலுவலர் குமார் தலைமையிலான அதிகாரிகளும் சம்பவ இடத்துக்கு விரைந்து வந்தனர்.
பதிக்கப்பட்ட குழாய்களை எடுத்துவிட்டு புதிய குழாய்கள் பதித்து குடிநீர் வினியோகம் செய்ய நடவடிக்கை எடுப்பதாக அதிகாரிகள் உறுதி அளித்தனர். இதை ஏற்றுக்கொண்ட பொதுமக்கள் போராட்டத்தை கைவிட்டு கலைந்து சென்றனர். இந்த போராட்டம் காரணமாக அந்த குதியில் 2 மணி நேரம் போக்குவரத்து பாதிக்கப்பட்டது.