பவானி
ஈரோடு மாவட்டம் பவானி காலிங்கராயன்பாளையத்தில் நேற்று காலிங்கராயன் தினவிழா நடைபெற்றது. இதில் அமைச்சர் கே.ஏ.செங்கோட்டையன் கலந்துகொண்டு காலிங்கராயன் சிலைக்கு மாலை அணிவித்து மரியாதை செலுத்தினார். பின்னர் நிருபர்களுக்கு பேட்டி அளித்தார்.
அப்போது அவர் கூறியதாவது:-
மக்கள் நல்வாழ்வு துறை வழங்கிய அறிவுரைப்படி பள்ளிகள் திறக்க நடவடிக்கை எடுக்கப்பட்டுள்ளது. சுகாதார வசதிகளுடன் பள்ளிகளில் இருக்கைகள் அனைத்தும் சரி பார்க்கப்பட்டு தயார் நிலையில் உள்ளன. பள்ளிக்கு வரும் மாணவ-மாணவிகளுக்கு சத்து மாத்திரைகள் வழங்கப்படும்.
சட்டமன்ற தேர்தல் அட்டவணை வெளியிட்ட பின்னர் பள்ளிகளில் பொதுத்தேர்வு நடத்துவது குறித்து முதல்-அமைச்சருடன் ஆலோசித்து பின்னர் தேதி அறிவிக்கப்படும்.
பாடத்திட்டங்கள் குறைப்பு குறித்த அட்டவணை அனைத்து முதன்மைக் கல்வி அலுவலர்கள், மாவட்ட கல்வி அலுவலர்களுக்கு அனுப்பப்பட்டுள்ளது, அதனை அவர்கள் பின்பற்றுவார்கள்.
இவ்வாறு அவர் கூறினார்.
