திண்டுக்கல்,
திண்டுக்கல் அருகே உள்ள வாழைக்காய்பட்டி நடுத்தெருவை சேர்ந்தவர் மதார் (வயது 70). இவர், அந்த பகுதியில் புதிதாக கட்டப்படும் கட்டிடத்தில் காவலாளியாக வேலை பார்த்து வருகிறார். கடந்த சில மாதங்களுக்கு முன்பு மதார், திண்டுக்கல்லில் உள்ள ஒரு தனியார் பள்ளியில் 8-ம் வகுப்பு படிக்கும் மாணவி ஒருவரை மிரட்டி பலமுறை கற்பழித்துள்ளார்.
இதற்கிடையே அந்த மாணவிக்கு திடீரென உடல்நலக்குறைவு ஏற்பட்டுள்ளது. இதனால், மாணவியை அவருடைய பெற்றோர், மதுரை அரசு மருத்துவமனைக்கு சிகிச்சைக்காக அழைத்து சென்றனர். அங்கு டாக்டர்கள் பரிசோதித்தபோது, மாணவி 5 மாதம் கர்ப்பமாக இருப்பது தெரியவந்தது. இதனால் அதிர்ச்சி அடைந்த பெற்றோர் மாணவியிடம் விசாரித்தபோது, காவலாளி தன்னை கற்பழித்து வந்ததை கூறியுள்ளார். இதுகுறித்து மாணவியின் பெற்றோர், திண்டுக்கல் அனைத்து மகளிர் போலீஸ் நிலையத்தில் புகார் அளித்தனர். அதன்பேரில் வழக்குப்பதிவு செய்த போலீஸ் சப்-இன்ஸ்பெக்டர் சாந்தி, போக்சோ சட்டத்தின் கீழ் (பாலியல் குற்றங்களில் இருந்து குழந்தைகளை பாதுகாக்கும் சட்டம்) மதாரை கைது செய்தார்.