ராமநாதபுரம்,
நாடு முழுவதும் வேகமாக பரவி வரும் கொரோனா மற்றும் ஒமைக்ரான் தொற்றை கருத்தில் கொண்டு 15 முதல் 18 வயதான பள்ளி மாணவ-மாணவிகளுக்கு தடுப்பூசி போட மத்திய அரசு அனுமதி அளித்துள்ளது. இதன்படி தமிழகத்தில் நேற்று முதல் பள்ளி மாணவ-மாணவிகளுக்கு அந்தந்த பள்ளிகளில் நேரடியாக சென்று தடுப்பூசி போடும் பணி தொடங்கியது. ராமநாதபுரம் மாவட்டத்தில் இந்த திட்டத்தின் கீழ் ராமநாதபுரம் மற்றும் பரமக்குடி சுகாதார மாவட்டங்களில் 61 ஆயிரம் மாணவ, மாணவிகளுக்கு தடுப்பூசி போட திட்டமிடப்பட்டுள்ளது. முதல் நாளான நேற்று சுமார் 6 ஆயிரத்து 100 மாணவ-மாணவிகளுக்கு இந்த தடுப்பூசி போடப்பட்டுள்ளது. இன்னும் ஒரு வார காலத்திற்குள் 61 ஆயிரம் மாணவ-மாணவிகளுக்கும் தடுப்பூசி போடப்பட்டு விடும் என ராமநாதபுரம் சுகாதார துணை இயக்குனர் டாக்டர் குமரகுருபரன் தெரிவித்துள்ளார்.