பம்பையில் இருந்து பழனி உள்பட முக்கிய இடங்களுக்கு நேரடி பஸ் வசதி - கேரள அரசு போக்குவரத்து கழகம் அறிவிப்பு

திருவனந்தபுரம்,

கேரள அரசு போக்குவரத்து கழகத்தின் சார்பில் வெளியிடப்பட்டுள்ள செய்திக்குறிப்பில் கூறப்பட்டுள்ளதாவது;-

சபரிமலைக்கு வரும் அய்யப்ப பக்தர்களின் வசதிக்காக கேரள அரசு போக்குவரத்து கழகம் சார்பில் 7-ந் தேதி (செவ்வாய்க்கிழமை) முதல் பம்பையில் இருந்து பழனி, கோவை மற்றும் தென்காசிக்கு சிறப்பு பஸ்கள் இயக்கப்படும். இதை தொடர்ந்து 2-ம் கட்டமாக சென்னை, மதுரை ஆகிய இடங்களுக்கும் பஸ்கள் இயக்கப்படும். மொத்தம் 12 பஸ்கள் தமிழ்நாட்டிற்கு இயக்கப்படும்.

தற்போது பம்பை பஸ் நிலையத்தில் இருந்து 128 பஸ்கள் மாநிலத்தின் பல்வேறு இடங்களுக்கு இயக்கப்பட்டு வருகிறது. டிசம்பர் 12-ந் தேதி முதல் மேலும் கூடுதலாக 99 பஸ்கள் இயக்கப்படும். நிலக்கல்- பம்பை வழித்தடத்தில் 24 மணி நேரமும் கேரள அரசு போக்குவரத்து கழகத்தின் தொடர் பஸ் வசதி உள்ளது.

நவம்பர் 16-ந் தேதி முதல் டிசம்பர் 1-ந் தேதி வரை 4 லட்சத்து 52 ஆயிரம் பக்தர்கள் இந்த வசதியினை பயன்படுத்தி உள்ளனர். தினசரி பம்பையில் இருந்து நேரடியாக செங்கன்னூருக்கு 35 பஸ்கள், கோட்டயத்திற்கு 10 பஸ்கள், திருவனந்தபுரத்திற்கு 10 பஸ்கள், எர்ணாகுளத்திற்கு 7 பஸ்கள், எருமேலிக்கு 4, பத்தனம்திட்டைக்கு 4, குமுளிக்கு 4 என பஸ்கள் இயக்கப்படுகிறது. மொத்தம் 306 பணியாளர்கள் இரவு, பகல் பாராது பணியாற்றி வருகிறார்கள்.

இவ்வாறு அந்த அறிக்கையில் கூறப்பட்டுள்ளது.