நமது வார்த்தைகள், செயல்கள் உலக அரங்கில் இந்தியாவின் நற்பெயரை குறைக்கக்கூடாது: கிரண் ரிஜிஜு

புதுடெல்லி,

இந்திய அரசியலமைப்புச் சட்டம் ஏற்றுக்கொள்ளப்பட்டு 75 ஆண்டுகள் ஆகிறது என்பது குறித்து இன்று மக்களவையில் விவாதம் நடைபெற்று வருகிறது. அதில் பேசிய மத்திய நாடாளுமன்ற விவகாரத்துறை மந்திரி கிரண் ரிஜிஜு கூறியதாவது,

நமது அரசியலமைப்பு உலகின் மிகப்பெரிய அரசியலமைப்பு மட்டுமல்ல, உலகின் மிக அழகான அரசியலமைப்பு. ஆனால் இங்கே ஒரு கதை உருவாக்கப்படுகிறது.

இந்தியா அனைவருக்கும் சமமான வாக்களிக்கும் உரிமையை வழங்கியிருந்தாலும், நாட்டில் சிறுபான்மையினருக்கு உரிமை இல்லை என்று சிலர் கூறுகின்றனர். உலகின் பிற பகுதிகளில் உள்ள சிறுபான்மையினருக்கு வாக்களிக்கும் உரிமை எவ்வாறு இருக்கிறது என்பதை நாம் ஒப்பிட்டுப் பார்க்க வேண்டும்.

ஆனால், சுதந்திரத்திற்குப் பிறகு அனைவருக்கும் சம உரிமையை இந்தியா உறுதி செய்தது. தொடர்ந்து வந்த அரசுகளும் சிறுபான்மையினரின் நலனுக்காக உழைத்துள்ளது. காங்கிரசும் அதைச் செய்துள்ளது, நான் அதன் பங்கைக் குறைமதிப்பிற்கு உட்படுத்தவில்லை.

இந்தியாவில் சிறுபான்மையினருக்கு எதிரான பாகுபாடு இல்லை. இந்தியா சிறுபான்மையினருக்கு சட்டப்பூர்வ பாதுகாப்பை வழங்குவது மட்டுமல்லாமல், அவர்களின் நலன்களைப் பாதுகாக்க உறுதியான நடவடிக்கைக்கான ஏற்பாடுகளையும் இந்த அரசு கொண்டுள்ளது. ஜனநாயகத்தில் இந்தியாவுடன் யாராலும் போட்டியிட முடியாது. நமது வார்த்தைகளும் செயல்களும் உலக அரங்கில் நாட்டின் நற்பெயரைக் குறைக்கக்கூடாது. இவ்வாறு அவர் கூறினார்.