புதுடெல்லி,
உத்தரப்பிரதேசம் மாநிலம், நொய்டாவில் உள்ள ஷா பரி கிராமத்தில், இரண்டு கட்டிடங்கள் இடிந்து விழுந்தன. புதிதாக கட்டப்பட்டு வந்த 6 மாடி கட்டிடம், திடீரென இடிந்து, அதன் அருகாமையில் இருந்த 4 குடியிருப்பு கட்டிடம் மீது விழுந்தது. இந்த பயங்கர விபத்தில், 4 மாடி கட்டிடத்தில் வசித்து வந்த 18 குடும்பங்களை சேர்ந்த சுமார் 30-க்கும் மேற்பட்டோர் இடிபாடுகளில் சிக்கியிருக்கலாம் என அஞ்சப்படுகிறது.
கட்டிட இடிபாடுகளுக்குள் சிக்கியிருபவர்களை மீட்கும் பணியில் தேசிய பேரிடர் மீட்புக்குழுவினர் ஈடுபட்டு வருகின்றனர். இந்த கட்டிட விபத்து குறித்து தகவல் அறிந்ததும், அப்பகுதியில் ஏராளமான பொதுமக்கள் கூடினர். இதனால், பொதுமக்களை கட்டுப்படுத்துவதற்காக 100-க்கும் மேற்பட்ட போலீசார் பாதுகாப்பு பணியில் ஈடுபட்டு உள்ளனர்.
தேசிய பேரிடர் மீட்பு படையினர் முழு வீச்சில் மீட்பு பணியில் ஈடுபட்டுள்ளனர். தற்போது வரை, 3- பேர் இறந்த நிலையில் மீட்கப்பட்டுள்ளனர். இந்த விபத்தில், பலி எண்ணிக்கை மேலும் அதிகரிக்க கூடும் என அஞ்சப்படுகிறது.