சென்னையை அடுத்த மடிப்பாக்கம் பகுதியில் வீடுகளின் முன் நிறுத்திவைக்கப்படும் மோட்டார் சைக்கிள்கள் தொடர்ந்து திருட்டு போவதாக மடிப்பாக்கம் போலீசாருக்கு புகார்கள் வந்தன. இதையடுத்து மடிப்பாக்கம் போலீஸ் உதவி கமிஷனர் பிராங்க் டி ரூபன் தலைமையில் மடிப்பாக்கம் குற்றப்பிரிவு இன்ஸ்பெக்டர் சீனிவாசன், சப்-இன்ஸ்பெக்டர்கள் ஜெயக்குமார், மணிமாறன் கொண்ட தனிப்படை அமைக்கப்பட்டது.
இந்த தனிப்படையினர் விசாரணை நடத்தி, பல்லாவரத்தை சேர்ந்த ராஜபாண்டியன் (வயது 28), அனகாபுத்தூரைச் சேர்ந்த பசாலுதீன் (26), சாம்சன் (24) ஆகிய 3 பேரை கைது செய்தனர். இவர்களிடம் நடத்திய விசாரணையில், இவர்கள் 3 பேரும் மடிப்பாக்கம் பகுதியில் வீடுகளின் முன் நிறுத்தி வைக்கப்படும் விலை உயர்ந்த மோட்டார் சைக்கிள்களை திருடி, அதன் பாகங்களை பழைய மோட்டார் சைக்கிள்களில் மாற்றி கோவை, கன்னியாகுமரி, திருச்சி போன்ற பகுதிகளில் விற்றது தெரியவந்தது. இவர்களிடம் இருந்து விலை உயர்ந்த 7 மோட்டார் சைக்கிள்களை போலீசார் பறிமுதல் செய்தனர்.