சென்னை,
தமிழகத்தில் நேற்றைய கொரோனா பாதிப்பு குறித்து மருத்துவம் மற்றும் மக்கள் நல்வாழ்வுத்துறை வெளியிட்டுள்ள செய்திக்குறிப்பில் கூறப்பட்டு இருப்பதாவது:-
தமிழகத்தில் நேற்று புதிதாக 1 லட்சத்து 46 ஆயிரத்து 219 பேருக்கு கொரோனா பரிசோதனை செய்யப்பட்டது. இதில் 849 ஆண்கள், 600 பெண்கள் என மொத்தம் 1,449 பேருக்கு புதிதாக கொரோனா உறுதி செய்யப்பட்டுள்ளது. இதில் அதிகபட்சமாக சென்னையில் 179 பேரும், கோவையில் 151 பேரும், ஈரோட்டில் 93 பேரும், செங்கல்பட்டில் 113 பேரும், தஞ்சாவூரில் 83 பேரும், திருப்பூரில் 72 பேரும் பாதிக்கப்பட்டுள்ளனர்.
மேலும் குறைந்தபட்சமாக ராமநாதபுரம், அரியலூரில் தலா 7 பேரும், பெரம்பலூரில் 6 பேரும், தென்காசியில் 3 பேரும் பாதிக்கப்பட்டுள்ளனர். இதில் 12 வயதுக்குட்பட்ட 76 குழந்தைகளுக்கும், 60 வயதுக்கு மேற்பட்ட முதியவர்கள் 231 பேருக்கும் தொற்று உறுதி செய்யப்பட்டுள்ளது. அந்தவகையில் 12-வது நாளாக தமிழகத்தில் தொற்று எண்ணிக்கை குறைந்து வருகிறது.
16 பேர் உயிரிழப்பு
தமிழகத்தில் இதுவரை 15 லட்சத்து 59 ஆயிரத்து 256 ஆண்களும், 11 லட்சத்து 12 ஆயிரத்து 117 பெண்களும், 3-ம் பாலினத்தவர் 38 பேர் உள்பட 26 லட்சத்து 71 ஆயிரத்து 411 பேருக்கு தொற்று உறுதி செய்யப்பட்டுள்ளது. அதில் 12 வயதுக்கு உட்பட்ட 1 லட்சத்து 114 குழந்தைகளும், 60 வயதுக்கு மேற்பட்ட 3 லட்சத்து 85 ஆயிரத்து 914 முதியவர்களும் இடம் பெற்றுள்ளனர்.
கொரோனாவுக்கு தமிழகத்தில் அரசு ஆஸ்பத்திரியில் மட்டும் 16 பேர் சிகிச்சை பலனின்றி நேற்று உயிரிழந்துள்ளனர். அதில் அதிகபட்சமாக தஞ்சாவூரில் 3 பேரும், நீலகிரி, கோவை, சென்னையில் தலா 2 பேரும் உள்பட 11 மாவட்டங்களில் உயிரிழப்பு ஏற்பட்டுள்ளது. 27 மாவட்டங்களில் உயிரிழப்பு இல்லை. தமிழகத்தில் இதுவரை மொத்தம் 35 ஆயிரத்து 682 பேர் கொரோனா நோய் தொற்றால் உயிரிழந்து உள்ளனர்.
1,548 பேர் டிஸ்சார்ஜ்
கொரோனா பாதிப்பில் இருந்து நேற்று 1,548 பேர் டிஸ்சார்ஜ்' செய்யப்பட்டுள்ளனர். சிகிச்சையில் 16 ஆயிரத்து 749 பேர் உள்ளனர்.
இவ்வாறு அதில் கூறப்பட்டுள்ளது.