மோட்டார்சைக்கிள் மோதி கட்டிட மேஸ்திரி பலி

காவேரிப்பட்டணம்:

தர்மபுரி மாவட்டம் பாப்பிரெட்டிப்பட்டி தாலுகா சுந்தரஅள்ளியை சேர்ந்தவர் தண்டபாணி (வயது 40). கட்டிட மேஸ்திரி. இவருடைய மகள் பிரியதர்ஷினி (17). இவர் பிளஸ்-2 படித்து வருகிறார். கடந்த 4-ந் தேதி தண்டபாணி தனது மகளுடன், தர்மபுரி- திருப்பத்தூர் சாலையில் புலியூர் பகுதியில் ஸ்கூட்டரில் சென்று கொண்டிருந்தார்.

அப்போது அந்த வழியாக மோட்டார்சைக்கிளில் வந்த நபர் தண்டபாணி ஓட்டி சென்ற ஸ்கூட்டர் மீது மோதினார். இதில் பலத்த காயம் அடைந்த தண்டபாணி, அவரது மகள் பிரியதர்ஷினி ஆகிய 2 பேரையும் அருகில் இருந்தவர்கள் மீட்டு சிகிச்சைக்காக தர்மபுரி அரசு ஆஸ்பத்திரியில் சேர்த்தனர். அங்கு சிகிச்சை பலனின்றி தண்டபாணி இறந்தார். பிரியதர்ஷினி சிகிச்சை பெற்று வருகிறார். இந்த விபத்து குறித்து பாரூர் போலீஸ் இன்ஸ்பெக்டர் ராஜேஷ் வழக்குப்பதிவு செய்து விசாரணை நடத்தி வருகிறார்.