கும்மிடிப்பூண்டி தாலுகாவில் அடங்கிய சின்ன சோழியம்பாக்கம் கிராமத்தை சேர்ந்தவர் யுவராஜ் (வயது 28). அதே பகுதியை சேர்ந்த முருகன் என்பவர் தனது மனைவியுடன் யுவராஜ் தொடர்பு வைத்திருப்பதாக சந்தேகப்பட்டு உறவினர்களுடன் சேர்ந்து யுவராஜை கடந்த 2012-ம் ஆண்டு கிரிக்கெட் மட்டையால் அடித்து கொலை செய்தார்.
இந்த வழக்கில் முருகன், மணி, தங்கராஜ், ராமச்சந்திரன், சண்முகம், ஸ்ரீராமுலு, ராமமூர்த்தி ஆகிய 7 பேர் கைது செய்யப்பட்டனர். இந்த வழக்கு விசாரணை பொன்னேரி கூடுதல் மாவட்ட அமர்வு நீதிமன்றத்தில் நடைபெற்று வந்தது.
வழக்கு விசாரணை நடந்து வந்தபோதே முருகன், சண்முகம் ஆகியோர் இறந்தனர். இதைத்தொடர்ந்து மற்ற 5 பேர் மீது வழக்கு விசாரணை கோர்ட்டில் நடந்து வந்தது.
இந்நிலையில் வழக்கு விசாரணை நேற்று முடிந்து நீதிபதி கிருஷ்ணசாமி தீர்ப்பு வழங்கினார். அதில் கொலை குற்றம் நிரூபிக்கப்பட்டதால் மணி, தங்கராஜ், ராமச்சந்திரன், ராமமூர்த்தி, ஸ்ரீராமுலு ஆகிய 5 பேருக்கு ஆயுள் தண்டனையுடன் தலா ஆயிரம் ரூபாய் அபராதம் விதிக்கப்பட்டது. இந்த வழக்கில் அரசு சார்பில் வக்கீல் கே.ஆர்.லாசர் ஆஜரானார். தண்டனை பெற்ற 5 பேரை கும்மிடிப்பூண்டி போலீசார் புழல் மத்திய சிறையில் அடைத்தனர்.