சென்னை,
எம்.பி.பி.எஸ்., பி.டி.எஸ். போன்ற மருத்துவ படிப்புகளில் சேருவதற்கு நீட்' தேர்வில் தேர்ச்சி பெற்று இருக்க வேண்டும் என்று தெரிவிக்கப்பட்டுள்ளது. இந்த தேர்வு மதிப்பெண் அடிப்படையிலேயே மருத்துவ படிப்புகளில் கடந்த 2016-ம் ஆண்டில் இருந்து நாடு முழுவதும் மாணவர் சேர்க்கை நடைபெறுகிறது. இதில் தமிழகம் மட்டும் 2016-ம் ஆண்டு விலக்கு பெற்று இருந்தது குறிப்பிடத்தக்கது.
இந்த நிலையில் 2017-ம் ஆணடில் இருந்து 2021-ம் ஆண்டு வரையில் நடந்து முடிந்த நீட் தேர்வை எவ்வளவு மாணவர்கள் எழுதினார்கள்? அதில் எவ்வளவு மாணவர்கள் தேர்ச்சி பெற்றனர்? என்பது போன்ற தகவல்கள் தேசிய தேர்வு முகமை (என்.டி.ஏ.) வெளியிட்டுள்ள புள்ளி விவரத்தில் தெரியவந்துள்ளன.
உயர்ந்து வருகின்றன
கடந்த 2017-ம் ஆண்டில் இருந்து ஒவ்வொரு ஆண்டும் நீட் தேர்வு எழுதும் மாணவ-மாணவிகளின் எண்ணிக்கையும், அதில் தேர்ச்சி பெறுபவர்களின் எண்ணிக்கையும் அதிகரித்து வருவதை பார்க்க முடிகிறது. அதே சமயத்தில் தேர்ச்சி பெறும் மாணவர்களுக்கு இடங்கள் போதுமான அளவில் கிடைக்கும் வகையில் மருத்துவ படிப்பு இடங்களும் ஒவ்வொரு ஆண்டும் உயர்ந்து வருகின்றன.
2020-ம் ஆண்டு 85 ஆயிரத்து 25 மருத்துவப் படிப்பு இடங்கள் இருந்த நிலையில், 2021-ம் ஆண்டு 89 ஆயிரத்து 875 ஆக அதிகரித்திருந்தது. அதேபோல், 2020-ம் ஆண்டு 7 லட்சத்து 71 ஆயிரத்து 500 பேர் தேர்ச்சி பெற்ற நிலையில், கடந்த 2021-ம் ஆண்டு 8 லட்சத்து 70 ஆயிரத்து 74 பேர் தேர்ச்சி அடைந்திருக்கின்றனர்.
10 மாணவர்களில் ஒருவருக்கே இடம்
இந்த புள்ளி விவரத்தின் அடிப்படையில் பார்க்கும்போது, ஒவ்வொரு ஆண்டும் இருக்கும் மருத்துவப் படிப்பு இடங்களில், ஒரு இடத்துக்கு நீட் தேர்வில் வெற்றி பெற்றவர்களில் 9 முதல் 10 மாணவர்கள் வரை போட்டியிடுகின்றனர். இதில் நீட் தேர்வு மதிப்பெண் தரவரிசை பட்டியல் அடிப்படையில் சிலருக்கும், இடஒதுக்கீடு, உள் ஒதுக்கீடு அடிப்படையில் சிலருக்கும், குறைந்த மதிப்பெண் பெற்றாலும் நிர்வாக ஒதுக்கீட்டில் (மேனேஜ்மெண்ட் கோட்டா) சிலருக்கும் மருத்துவ படிப்பு இடங்கள் கிடைக்கின்றன.