வாஷிங்டன்,

அமெரிக்காவின் வெள்ளை மாளிகையில் வர்த்தக ஆலோசகராக இருப்பவர் பீட்டர் நவர்ரோ. அமெரிக்க ஜனாதிபதி டொனால்டு டிரம்பின் நெருங்கிய உதவியாளரான இவர், இந்தியா மீது பெரிய குற்றச்சாட்டை சுமத்தியுள்ளார். இரு நாடுகளிடையே வரி விதிப்பு தொடர்பான பதற்றங்கள் அதிகரித்து உள்ள சூழலில் அவர் கூறியது சர்ச்சையை ஏற்படுத்தி உள்ளது.

அவர் நிகழ்ச்சி ஒன்றில் கூறும்போது, இந்தியாவின் செயலால் அமெரிக்காவில் உள்ள ஒவ்வொருவரும் பாதிக்கப்படுகின்றனர். நுகர்வோர்கள், தொழிலதிபர்கள் மற்றும் அனைவருக்கும் பாதிப்பு ஏற்படுகிறது. இந்தியாவின் அதிக வரி விதிப்புகளால், தொழிலாளர்கள் வேலையிழக்கின்றனர். மோடியின் போருக்கு நாங்கள் விலை கொடுக்க வேண்டியுள்ளது என்றார்.

அப்போது, புதினின் போர் என கூற விரும்புவதற்கு பதிலாக, தவறாக கூறி விட்டீர்களா? என நிகழ்ச்சி தொகுப்பாளர் கேட்டதற்கு, உள்நோக்கத்துடனேயே கூறினேன். ஏனெனில், அமைதிக்கான வழியானது புதுடெல்லியின் வழியேயும் செல்கிறது என பீட்டர் கூறியுள்ளார்.

ரஷியாவிடம் இருந்து கச்சா எண்ணெய் வாங்கும் நாடுகளால் அந்நாட்டுக்கு பொருளாதார வளம் சேருகிறது என்றும் அது போரை ஊக்குவிக்கிறது என்றும் அமெரிக்கா கூறி வருகிறது. இதன் ஒரு பகுதியாக, ரஷியாவிடம் இருந்து கச்சா எண்ணெய் வாங்கியதற்கு எதிரான நடவடிக்கையாக, இந்தியா மீது வரிகள் விதிக்கப்படுகிறது என டிரம்ப் தலைமையிலான அரசு கூறி வருகிறது.

இதன்படி, 25 சதவீத கூடுதல் வரி உள்பட மொத்தம் 50 சதவீத வரியானது இந்திய பொருட்கள் மீது விதிக்கப்படும் என டிரம்ப் அரசு தெரிவித்தது. இந்திய இறக்குமதி பொருட்கள் மீது விதிக்கப்படும் 25 சதவீத கூடுதல் வரி தொடர்பான நோட்டீஸ் ஒன்றையும் அமெரிக்கா பிறப்பித்தது. இந்த நடைமுறை நேற்று (27-ந்தேதி) அதிகாலை 12.01 மணி முதல் நடைமுறைக்கு வந்துள்ளது.

இதனால், இந்தியாவில் உள்ள நூற்றுக்கணக்கான சிறு, குறு மற்றும் நடுத்தர நிறுவனங்கள் கடுமையான பாதிப்புகளை சந்திக்கும். வேலைவாய்ப்பின்மை மற்றும் பணி நீக்கம் போன்றவையும் அந்நிறுவன தொழிலாளர்களை பாதிக்கும். இதேபோன்று 2026 நிதியாண்டில் 0.2 சதவீதம் முதல் 1 சதவீதம் வரை மொத்த உள்நாட்டு உற்பத்தியும் குறையும் என பொருளாதார நிபுணர்கள் கூறுகின்றனர்.