இந்தியா வந்த கால்பந்து ஜாம்பவான் மெஸ்ஸி..செல்லும் இடமெல்லாம் உற்சாக வரவேற்பு!

2022ம் ஆண்டு உலகக் கோப்பை கால்பந்து போட்டியில் சாம்பியன் பட்டம் வென்ற அர்ஜென்டினா அணியின் கேப்டனும், உலகின் முன்னணி நட்சத்திர வீரர்களில் ஒருவருமான மெஸ்ஸி 3 நாள் சுற்றுப்பயணமாக இந்தியா வந்தார்.

கொல்கத்தாவில் லேக் டவுன் பகுதியில் ஸ்ரீபூமி விளையாட்டு கிளப் சார்பில் நிறுவப்பட்டுள்ள தனது 70 அடி உயர உருவச்சிலையை திறந்து வைத்தார்.

தொடர்ந்து அங்குள்ள 78 ஆயிரம் இருக்கை வசதி கொண்ட சால்ட் லேக் ஸ்டேடியத்தில் அவரை காண்பதற்கான பிரமாண்டமான நிகழ்ச்சிக்கு ஏற்பாடு செய்யப்பட்டு இருந்தது.

இந்த நிகழ்ச்சியில் பங்கேற்க வந்த மெஸ்ஸியை, இந்தி நடிகர் ஷாருக்கான் உள்ளிட்டோர் வரவேற்றதுடன் அவருடன் போட்டோ எடுத்து கொண்டனர்.

சுமார் 22 நிமிடங்களில் மெஸ்ஸி ரசிகர்கள் சந்திப்பு நிகழ்ச்சியை முடித்து கொண்டு வெளியேறினார். மெஸ்ஸியை கண் குளிர பார்க்க முடியவில்லை என ரசிகர்கள் ஸ்டேடியத்தில் வன்முறையில் ஈடுபட்டனர்.

தொடர்ந்து ஐதராபாத்துக்கு சென்ற மெஸ்ஸி, அங்கு தெலுங்கானா முதல்-மந்திரி ரேவந்த் ரெட்டி உள்ளிட்டோருடன் இணைந்து விளையாடினார். இந்த நிகழ்ச்சியில் எதிர்க்கட்சி தலைவர் ராகுல் காந்தி கலந்து கொண்டார். அவருக்கு மெஸ்ஸி அர்ஜென்டினா அணியின் சீருடையை பரிசாக வழங்கினார்.

இன்று மும்பை வான்கடே மைதானத்திற்கு வந்த மெஸ்ஸிக்கு ரசிகர்கள் உற்சாக வரவேற்பு அளித்தனர். மைதானத்தில் நிரம்பி இருந்த ரசிகர்கள் 'மெஸ்ஸி மெஸ்ஸி' என கோஷம் எழுப்பினர்.

கிரிக்கெட் ஜாம்பவான் சச்சின் தெண்டுல்கரை மெஸ்ஸி சந்தித்து பேசினார். தனது கையெழுத்திட்ட இந்திய கிரிக்கெட் அணியின் ஜெர்சியை மெஸ்ஸிக்கு சச்சின் வழங்கினார்.

நாளை (15.12.2025) டெல்லி போய் சேரும் அவர் அருண் ஜெட்லி ஸ்டேடியத்தில் நடைபெறும் கால்பந்து நிகழ்ச்சியில் கலந்து கொள்கிறார். அடுத்து அவர் பிரதமர் மோடியை சந்தித்து கலந்துரையாடுகிறார்.