அறுசுவைகளும் அவற்றின் ஆரோக்கிய நன்மைகளும்!

துவர்ப்புச் சுவை: அதிக வியர்வையைக் கட்டுப்படுத்தி, ரத்தப் போக்கு, வயிற்றுப் போக்கினை சரி செய்கிறது. அதிகமானால் இளமையில் முதுமை தோற்றம் ஏற்படும். வாய் உலர்ந்து போவதுடன் சரளமாக பேசுவதை பாதிக்கும்.

இனிப்புச் சுவை: மனதிற்கும், உடலுக்கும் உடனடி உற்சாகத்தைத் தரும் சுவை இது. குழந்தைகளின் உடல் வளர்ச்சிக்கு உதவுகிறது. அதிகமானால் உடல் தளர்வு, சோர்வு, தூக்கம், இருமல், உடல் எடை கூடுதல் போன்ற சிக்கல்கள் தோன்றலாம்.

புளிப்புச் சுவை: பசியுணர்வைத் தூண்டி, உணர்வு நரம்புகளை வலுப்பெறச் செய்கிறது. இதயத்திற்கும், செரிமானத்திற்கும் நல்லது. அதிகமானால் பற்களைப் பாதிக்கும். நெஞ்செரிச்சல், ரத்த அழுத்தம், அரிப்பு போன்ற தொந்தரவுகளை ஏற்படுத்தி உடலை தளரச் செய்யும்.

காரம்: உடல் இளைக்கவும், உடலின் அதிகப்படியான நீரை வெளியேற்றவும், இரத்தச் சுத்திகரிக்கவும் செய்கிறது. தோல் நோய்களுக்கு நல்ல பலன் தருகிறது. அதிக காரம், உடல் எரிச்சல், உடல் சூட்டை அதிகரித்து, வியர்வையை அதிகம் சுரக்கச் செய்யும்.

கசப்புச் சுவை: அதிக நன்மை தரும் சுவை இது. சிறந்த நோய் எதிர்ப்புச் சக்தி கொண்டது. தாகத்தைக் கட்டுப்படுத்துகிறது. உடல் எரிச்சல், அரிப்புகளில் நிவாரணம் தருகிறது. அதிகமானால் உடலின் நீர்ச்சத்து குறைந்து, மேனி வறண்டு கடினமாகும்.

உவர்ப்புச் சுவை: இது, அளவோடு இருக்கும் பட்சத்தில் உமிழ் நீரைச் சுரக்கச் செய்கிறது. மற்ற சுவைகளை சமன் செய்து செரிமானத்தில் பங்கு வகிக்கிறது. இச்சுவை அதிகமானால் உடல் சூடு காரணமாக சிறு கட்டி, பரு தோன்றும்.

அறுசுவைகளையும் தமிழ் புத்தாண்டு நாளில் மட்டுமல்லாமல் வருடத்தின் அனைத்து நாட்களிலும் அளவாக உண்டு ஆரோக்கியமாக வாழ்வோம்.