பந்து வீச்சாளர் தரவரிசையில் அஸ்வின், ஆண்டர்சன் இணைந்து முதலிடம்..!

துபாய்,

சர்வதேச கிரிக்கெட் கவுன்சில் (ஐ.சி.சி.) டெஸ்ட் கிரிக்கெட் வீரர்களின் புதிய தரவரிசை பட்டியலை நேற்று வெளியிட்டது. பந்து வீச்சாளர்கள் தரவரிசையில் கடந்த வாரம் முதலிடத்தை பிடித்த இந்திய சுழற்பந்து வீச்சாளர் ஆர்.அஸ்வின், ஆஸ்திரேலியாவுக்கு எதிரான 3-வது டெஸ்டில் 4 விக்கெட்டுகள் மட்டுமே வீழ்த்தியதால் 6 தரவரிசை புள்ளியை இழந்து 859 புள்ளிகளுடன் நம்பர் ஒன் இடத்தை இங்கிலாந்து வேகப்பந்து வீச்சாளர் (859 புள்ளிகள்) ஜேம்ஸ் ஆண்டர்சனுடன் இணைந்து வகிக்கிறார்.

ஆஸ்திரேலிய வேகப்பந்து வீச்சாளர் கம்மின்ஸ் (849 புள்ளி) 3-வது இடத்தில் நீடிக்கிறார். தென்ஆப்பிரிக்க வேகப்பந்து வீச்சாளர் ரபடா (807 புள்ளி) 3 இடம் உயர்ந்து 4-வது இடத்தை பிடித்துள்ளார். இந்திய வீரர் ரவீந்திர ஜடேஜா 8-வது இடத்தில் தொடருகிறார். இந்தியாவுக்கு எதிரான 3-வது டெஸ்டில் ஜொலித்த ஆஸ்திரேலிய சுழற்பந்து வீச்சாளர் நாதன் லயன் 6 இடங்கள் அதிகரித்து 9-வது இடத்தை பிடித்துள்ளார்.

பேட்ஸ்மேன்கள் தரவரிசையில் ஆஸ்திரேலிய வீரர் லபுஸ்சேன் (919 புள்ளி) முதலிடத்தில் நீடிக்கிறார். ஆஸ்திரேலிய வீரர் உஸ்மான் கவாஜா 2 இடம் முன்னேறி 9-வது இடத்தை அடைந்துள்ளார்.