துபாய்,
10 அணிகள் பங்கேற்கும் உலகக்கோப்பை கிரிக்கெட் தொடர் அடுத்த மாதம் (அக்டோபர்) 5-ந்தேதி முதல் நவம்பர் 19-ந்தேதி வரை இந்தியாவின் 10 நகரங்களில் நடக்கிறது. இந்த தொடருக்கு முன்பாக ஒருநாள் தரவரிசையில் 'நம்பர் 1' இடத்தை பிடிக்க ஆஸ்திரேலியா, பாகிஸ்தான் மற்றும் இந்தியா இடையே போட்டி நிலவுகிறது.
இதனிடையே, சர்வதேச கிரிக்கெட் கவுன்சில் (ஐசிசி) ஒருநாள் போட்டிகளுக்கான அணிகளின் புதிய தரவரிசை பட்டியலை வெளியிட்டுள்ளது. அதில் ஆஸ்திரேலிய அணி முதலிடத்தில் தொடருகிறது. ஆசிய கோப்பையில் இலங்கைக்கு எதிரான ஆட்டத்தில் தோல்வியடைந்ததால் பாகிஸ்தான் அணி 3-வது இடத்திற்கு சரிந்துள்ளது.
அதேவேளையில், ஆசிய கோப்பையில் தொடர் வெற்றிகளை பெற்றுவரும் இந்திய அணி 2-வது இடத்திற்கு முன்னேறியுள்ளது. இன்று நடைபெற உள்ள வங்காளதேசத்திற்கு எதிரான ஆட்டத்தில் இந்திய அணி வெற்றி பெற்று, அதேசமயம் ஆஸ்திரேலிய அணி தென் ஆப்பிரிக்காவுக்கு எதிராக தோல்வி அடைந்தால் இந்திய அணி நம்பர் 1 இடத்தை பிடித்துவிடும். மாறாக இவ்விரண்டு அணிகளும் தோல்வி அடைந்தால் பாகிஸ்தான் முதலிடத்திற்கு முன்னேறும்.