புனே,
இங்கிலாந்து கிரிக்கெட் அணி, இந்தியாவில் சுற்றுப்பயணம் செய்து விளையாடி வருகிறது. இவ்விரு அணிகள் இடையிலான 4 ஆட்டங்கள் கொண்ட டெஸ்ட் தொடரை 3-1 என்ற கணக்கிலும், 5 ஆட்டங்கள் கொண்ட 20 ஓவர் தொடரை 3-2 என்ற கணக்கிலும் இந்திய அணி கைப்பற்றியது.
இதனை அடுத்து இவ்விரு அணிகள் இடையேயான 3 ஆட்டங்கள் அடங்கிய ஒரு நாள் போட்டி தொடர் மராட்டிய மாநிலம் புனேயில் உள்ள மராட்டிய கிரிக்கெட் சங்க ஸ்டேடியத்தில் கொரோனா தடுப்பு பாதுகாப்பு நடைமுறைகளை பின்பற்றி நடத்தப்படுகிறது. ரசிகர்களுக்கு அனுமதி இன்றி நடைபெறும் இந்த போட்டி தொடர் பூட்டிய ஸ்டேடியத்தில் அரங்கேறுகிறது. இவ்விரு அணிகளுக்கு இடையேயான முதல் போட்டியில் இந்தியாவும், இரண்டாவது போட்டியில் இங்கிலாந்தும் வெற்றிபெற்றன. இரு அணிகளும் 1-1 என்ற புள்ளிகளுடன் சமநிலையில் உள்ளன.
இந்நிலையில், இந்தியா-இங்கிலாந்து அணிகள் மோதும் 3-வது மற்றும் கடைசி ஒருநாள் கிரிக்கெட் போட்டி புனேயில் இன்று பகல்-இரவு ஆட்டமாக நடைபெறுகிறது. இரு அணிகளுக்கு இடையேயான மூன்றாவது ஒருநாள் போட்டிக்கான டாஸ் சுண்டப்பட்டது. அதில் டாஸ் வென்ற இங்கிலாந்து அணியின் கேப்டன் பட்லர் பந்துவீச்சை தேர்வு செய்தார். இதையடுத்து, இந்திய அணி முதலில் பேட்டிங் செய்துவருகிறது.
இப்போட்டியில் வெற்றிபெற்று ஒருநாள் தொடரை கைப்பற்ற இரு அணிகளும் தீவிரமாக விளையாடும் என்பதால் அப்போட்டியில் பரபரப்பிற்கு பஞ்சம் இருக்காது. தற்போதைய நிலவரப்படி, இந்திய அணி 7 ஓவர்கள் முடிவில் விக்கெட் இழப்பின்றி 36 ரன்கள் எடுத்துள்ளது. தவான் மற்றும் ரோகித் சர்மா களத்தில் உள்ளனர்.
அணி வீரர்கள் விவரம்:-
இந்தியா: ரோகித் சர்மா, ஷிகர் தவான், விராட்கோலி (கேப்டன்), கேஎல் ராகுல், ரிஷப் பண்ட், ஹர்திக் பாண்ட்யா, குர்னால் பாண்ட்யா, புவனேஷ்வர் குமார், ஷர்துல் தாகூர், நடராஜன், பிரசித் கிருஷணா.
இங்கிலாந்து: ஜாசன் ராய், ஜானி பேர்ஸ்டோ, பென் ஸ்டோக்ஸ், டேவிட் மிலான், ஜோஸ் பட்லர் (கேப்டன்), லியம் லிவிங்ஸ்டன், மொயீன் அலி, சாம் கர்ரன், அடில் ரஷித், ரீசி டாப்லீ, மார்க் உட்.