ஐபிஎல் கிரிக்கெட் : பிளேஆப் மற்றும் இறுதிப்போட்டிகள் துவங்கும் நேரத்தில் மாற்றம்

புதுடெல்லி,

இந்திய கிரிக்கெட் வாரியத்தால் கடந்த 2008 ஆம் ஆண்டு முதல் ஐபிஎல்-20 ஓவர் கிரிக்கெட் போட்டித்தொடர்கள் நடத்தப்பட்டு வருகின்றன. நிகழாண்டு, ஏப்ரல் மாதத்தில் துவங்கிய 11-வது ஐபிஎல் போட்டிகள் முக்கிய கட்டத்தை எட்டியுள்ளன. வழக்கமாக இரவு 8 மணிக்கு ஐபிஎல் போட்டிகள் துவங்குகின்றன. 8 மணிக்கு துவங்கும் போட்டிகள் முடிவடைவதற்கு நள்ளிரவு 12 மணி வரை ஆகிறது. இதனால், ரசிகர்கள் போட்டி முடிந்து வீடு திரும்புவது உள்பட சில பிரச்சினைகளை எதிர்கொள்கின்றனர்.

ரசிகர்களின் கஷ்டத்தை மனதில் கொண்டு ஐபிஎல் 2018 பிளே ஆப் சுற்றுகளின் நேரத்தை ஐபிஎல் நிர்வாகம் மாற்றியுள்ளது. ஐபிஎல் சேர்மன் ராஜீவ் சுக்லா இது பற்றி தனியார் ஆங்கில தொலைக்காட்சி ஒன்றுக்கு கூறுகையில், பிளே ஆஃப் சுற்றுப் போட்டிகள் மாலை 7.00 மணிக்குத் தொடங்கும், 8 மணி போட்டிகள் முடிவடைய கிட்டத்தட்ட நள்ளிரவு 12 மணி வரை ஆவதால் தொலைக்காட்சி நேயர்கள், மைதானப் பார்வையாளர்கள் ஆகியோரின் மறுநாள் காலை பணிகளைக் கருத்தில் கொண்டு 7 மணிக்கு மாற்றம் செய்துள்ளதாக அவர் தெரிவித்தார்.

நடப்பு ஐபிஎல் தொடரின் பிளேஆப் சுற்று போட்டிகள் மே 22 மற்றும் 25 ஆம் தேதிகளிலும் இறுதிப்போட்டி 27 ஆம் தேதியும் நடைபெற உள்ளது. முதலில் பிளே ஆப் சுற்றுப் போட்டிகள் புனேயில் வைக்கப்பட்டிருந்தது. ஆனால் காவிரிப் பிரச்சினையால் ஐபிஎல் எதிர்ப்புகள் கிளம்ப சென்னை போட்டிகள் புனேவுக்கு மாற்றப்பட்டன. இதனையடுத்து பிளே ஆஃப் சுற்றுப் போட்டிகள் கொல்கத்தாவுக்கு மாற்றப்பட்டுள்ளன. இறுதிப்போட்டி மும்பை வான்கடே மைதானத்தில் நடைபெறுகிறது.