துபாய்,

சாம்பியன்ஸ் டிராபியில் நேற்று நடைபெற்ற ஆட்டத்தில் இந்தியா - நியூசிலாந்து அணிகள் மோதின. இதில் இந்தியா 44 ரன்கள் வித்தியாசத்தில் அபார வெற்றி பெற்றது. அதன்படி நடைபெற்ற இந்த ஆட்டத்தில் டாஸ் வென்ற நியூசிலாந்து பந்துவீச்சை தேர்வு செய்தது. அதன்படி முதலில் பேட்டிங் செய்த இந்திய அணி 50 ஓவர்கள் முடிவில் 9 விக்கெட்டுக்கு 249 ரன்கள் சேர்த்தது. அதிகபட்சமாக ஸ்ரேயாஸ் ஐயர் 79 ரன்கள் அடித்தார். நியூசிலாந்து தரப்பில் வேகப்பந்து வீச்சாளர் மேட் ஹென்றி 5 விக்கெட்டுகள் கைப்பற்றினார்.

பின்னர் 250 ரன்கள் அடித்தால் வெற்றி என்ற இலக்கை நோக்கி களமிறங்கிய நியூசிலாந்து அணி 45.3 ஓவர்களில் 205 ரன்னில் ஆல்-அவுட் ஆனது. இதன் மூலம் இந்தியா 44 ரன்கள் வித்தியாசத்தில் வெற்றி பெற்றது. நியூசிலாந்து தரப்பில் அதிகபட்சமாக வில்லியம்சன் 81 ரன்கள் அடித்தார். இந்தியா தரப்பில் வருண் சக்ரவர்த்தி 5 விக்கெட்டுகள் வீழ்த்தினார்.

ஒருநாள் கிரிக்கெட்டில் இந்த ஆட்டத்தையும் சேர்த்து இந்தியா தொடர்ச்சியாக 13-வது முறையாக டாஸில் தோல்வியை தழுவியிருக்கிறது. இதன் மூலம் தொடர்ச்சியாக அதிக டாஸ் தோற்ற அணி என்ற மோசமான உலக சாதனையை இந்தியா படைத்துள்ளது.

மேலும் இந்திய கேப்டன் ரோகித் சர்மா தொடர்ச்சியாக சந்தித்த 10-வது டாஸ் தோல்வி இதுவாகும். இதன் மூலம் ஒருநாள் கிரிக்கெட் வரலாற்றில் தொடர்ச்சியாக அதிக டாஸ் தோல்விகளை சந்தித்த 3-வது கேப்டன் என்ற மோசமான சாதனைக்கு சொந்தக்காரர் ஆகியுள்ளார்.

அந்த பட்டியல்:

1.பிரையன் லாரா - 12 முறை

2. பீட்டர் போரேன் - 11 முறை

3. ரோகித் சர்மா - 10 முறை