மாட்ரிட்,
ஸ்பெயின் கால்பந்து அணியின் தலைமை பயிற்சியாளராக 2016-ம் ஆண்டு முதல் ஜூலென் லோப்டெகுய் இருந்து வந்தார். அவரது பயிற்சியின் கீழ் ஸ்பெயின் அணி 14 ஆட்டத்தில் வெற்றியும், 6 ஆட்டத்தில் டிராவும் சந்தித்துள்ளது. இந்த நிலையில் ரியல் மாட்ரிட் கிளப்பின் புதிய பயிற்சியாளராக ஜூலென் லோப்டெகுய் நேற்று முன்தினம் நியமிக்கப்பட்டார். உலக கோப்பை போட்டி முடிந்ததும் அவர் ரியல் மாட்ரிட் அணியின் பயிற்சியாளர் பொறுப்பை ஏற்க உள்ளார்.
இதற்கிடையே, தங்களுக்கு தகவல் எதுவும் தெரிவிக்காமல் ரியல் மாட்ரிட் அணியின் நிர்வாகத்துடன் பயிற்சியாளர் பதவிக்கு பேச்சுவார்த்தை நடத்தியதால் ஆத்திரம் அடைந்த ஸ்பெயின் கால்பந்து சங்கம், தலைமை பயிற்சியாளர் பதவியில் இருந்து 51 வயதான ஜூலென் லோப்டெகுய்யை நேற்று அதிரடியாக நீக்கியது. ஸ்பெயின் அணி, உலக கோப்பையில் தங்களது முதல் லீக் ஆட்டத்தில் நாளை களம் இறங்க உள்ள நிலையில், பயிற்சியாளர் கழற்றி விடப்பட்டு இருப்பது கால்பந்து உலகில் பரபரப்பை ஏற்படுத்தி இருக்கிறது. ஸ்பெயின் அணியின் புதிய பயிற்சியாளராக அந்த நாட்டை சேர்ந்த முன்னாள் வீரர் பெர்னாண்டோ ஹியரோ உடனடியாக நியமிக்கப்பட்டார்.