ஆல் இங்கிலாந்து பேட்மிண்டன்: பெண்கள் ஒற்றையர் பிரிவில் கரோலினா மரின் 'சாம்பியன்'

பர்மிங்காம்,

நூற்றாண்டு காலம் பழமைவாய்ந்த ஆல் இங்கிலாந்து பேட்மிண்டன் தொடர் பர்மிங்காமில் நடந்து வந்தது. இதில் நேற்று நடந்த பெண்கள் ஒற்றையர் இறுதி ஆட்டத்தில் முன்னாள் ஒலிம்பிக் சாம்பியன் கரோலினா மரின் (ஸ்பெயின்), 2 முறை உலக சாம்பியனான ஜப்பானின் அகானே யமாகுச்சியை சந்தித்தார்.

இதில் மரின் 26-24, 11-1 என்ற கணக்கில் முன்னிலையில் இருந்த போது காயத்தால் யமாகுச்சி விலகினார். இதனால் மரின் வெற்றி பெற்றதாக அறிவிக்கப்பட்டு கோப்பையை தட்டிச் சென்றார். இந்த பட்டத்தை மரின் ருசிப்பது இது 2-வது முறையாகும். ஏற்கனவே 2015-ம் ஆண்டிலும் இங்கு மகுடம் சூடியிருந்தார்.

இதன் ஆண்கள் பிரிவில் இந்தோனேசியாவின் ஜோனதன் கிறிஸ்டி 21-15, 21-14 என்ற நேர் செட்டில் சக நாட்டவர் அந்தோனி சினிசுகாவை சாய்த்து பட்டத்தை கைப்பற்றினார். இந்த போட்டியில் இந்திய தரப்பில் 14 வீரர், வீராங்கனைகள் களம் கண்டனர். இவர்களில் சிறந்த செயல்பாடாக லக்ஷயா சென் அரைஇறுதி வரை முன்னேறி இருந்தார்.