சென்னை,
தமிழ்நாடு விளையாட்டு மேம்பாட்டு ஆணையம் சார்பில் மொத்தம் ரூ.70 லட்சம் பரிசுத்தொகைக்கான சென்னை கிராண்ட்மாஸ்டர்ஸ் செஸ் சாம்பியன்ஷிப் போட்டி கோட்டூர்புரத்தில் உள்ள அண்ணா நூற்றாண்டு நூலகத்தில் நேற்று தொடங்கியது. 7 சுற்று கொண்ட இந்த போட்டியில் மாஸ்டர்ஸ் பிரிவில் 8 சர்வதேச வீரர்கள் பங்கேற்றுள்ளனர்.
இதன் முதலாவது சுற்றில் உலக தரவரிசையில் 4-வது இடம் வகிக்கும் இந்தியாவின் அர்ஜூன் எரிகைசி, சக நாட்டவரான விதித் குஜராத்தியுடன் மல்லுக்கட்டினார். கருப்புநிற காய்களுடன் ஆடிய எரிகைசி 5 மணி நேர போராட்டத்துக்கு பிறகு 96-வது நகர்த்தலில் குஜராத்தியை வீழ்த்தினார். தனது எலோரேட்டிங் புள்ளி 2,800-ஐ கடந்து வரலாறு படைத்த எரிகைசி அதன் பிறகு இந்தியாவில் கலந்து கொண்ட முதல் போட்டி இதுவாகும்.
