புதுடெல்லி,
இந்திய ஓபன் சர்வதேச பேட்மிண்டன் போட்டி டெல்லியில் நடந்து வருகிறது. இதில் நேற்றிரவு நடந்த ஆண்கள் ஒற்றையர் பிரிவு ஆட்டத்தில் நடப்பு சாம்பியனான இந்திய இளம் வீரர் லக்ஷயா சென் 21-16, 15-21, 18-21 என்ற செட் கணக்கில் டென்மார்க்கின் ராஸ்மஸ் ஜெம்கேவிடம் போராடி தோற்றார். இந்த ஆட்டம் 1 மணி 21 நிமிடங்கள் நடந்தது.
இதே போல் பெண்கள் ஒற்றையர் 2-வது சுற்று ஆட்டத்தில் முன்னாள் சாம்பியனான இந்தியாவின் சாய்னா நேவால், ஒலிம்பிக் சாம்பியன் சீனாவின் சென் யு பேவுடன் மோதினார். இதில் சாய்னா நேவால் 9-21, 12-21 என்ற நேர் செட்டில் சீன வீராங்கனையிடம் பணிந்தார்.
பெண்கள் இரட்டையரில் திரீஷா ஜாலி- காயத்ரி கோபிசந்த் கூட்டணி 9-21, 16-21 என்ற நேர் செட்டில் சீனாவின் ஜாங் ஷூ ஸியான்- ஜெங் யு இணையிடம் தோல்வி அடைந்தது.
ஆண்கள் இரட்டையரில் நடப்பு சாம்பியனான இந்தியாவின் சாத்விக் சாய்ராஜ் ரங்கிரெட்டி- சிராக் ஷெட்டி ஜோடி காயத்தால் விலகியது. சாத்விக் இடுப்பு பகுதியில் காயத்தால் அவதிப்படுகிறார். இத்துடன் இந்திய ஓபனில் இந்தியாவின் சவால் முடிவுக்கு வந்தது.