கோல்டுகோஸ்ட்,
காமன்வெல்த் ஆடவர் இரட்டையர் பிரிவு பேட்மிண்டனில் இறுதிப்போட்டியில் இந்தியாவின் சாத்விக், சிராக் ஜோடி வெள்ளிப்பதக்கத்தை கைப்பற்றினர்.
21-வது காமன்வெல்த் விளையாட்டு போட்டி ஆஸ்திரேலியாவின் கோல்டுகோஸ்ட் நகரில் நடந்து வருகிறது. இந்த விளையாட்டு திருவிழாவின் 11-வது நாளான இன்று இந்தியா பதக்க வேட்டையை தொடர்ந்து வருகிறது.
காமன்வெல்த் போட்டியில் இன்று பேட்மிண்டன் இறுதி சுற்று ஆட்டங்கள் நடைபெற்றன. ஆடவர் இரட்டையர் பிரிவு இறுதிப்போட்டியில் இந்தியாவின் சாத்விக் ராங்கிரெட்டி-சிராக் சந்திரசேகர் ஷெட்டி ஜோடி, இங்கிலாந்தின் மார்கஸ் எல்லீஸ்-சிரிஸ் லான்கிரிட்ஜ் ஜோடியை எதிர்கொண்டது. இப்போட்டியில் இங்கிலாந்து ஜோடி 21-13, 21-16 என்ற நேர் செட்களில் வெற்றி பெற்று தங்கப்பதக்கத்தை தட்டிச் சென்றது. இதனால் இந்தியாவுக்கு வெள்ளிப்பதக்கம் கிடைத்தது.
இதன் மூலம் இந்தியா 26 தங்கம், 20 வெள்ளி, 20 வெண்கலம் என மொத்தம் 66 பதக்கங்களுடன் தொடர்ந்து மூன்றாவது இடத்தில் நீடிக்கிறது.