சென்னை,
உலக டேபிள் டென்னிஸ் ஸ்டார் கன்டென்டர் போட்டி சென்னையை அடுத்த மேலக்கோட்டையூரில் உள்ள தமிழ்நாடு உடற்கல்வியியல் மற்றும் விளையாட்டு பல்கலைக்கழகத்தில் நடந்து வருகிறது. இதில் ஆண்கள் இரட்டையர் பிரிவில் நேற்று நடந்த அரையிறுதி ஆட்டத்தில் இந்தியாவின் சத்யன் - ஹர்மீத் தேசாய் ஜோடி, தென் கொரியாவின் லிம் ஜாங் ஹூன் - ஓ ஜுன்சங் ஜோடியுடன் மோதியது.
விறுவிறுப்பாக நடைபெற்ற இந்த ஆட்டத்தில் சத்யன் - ஹர்மீத் தேசாய் ஜோடி 2-11, 3-11, 10-12 என்ற செட் கணக்கில் லிம் ஜாங் ஹூன் - ஓ ஜுன்சங் ஜோடியிடம் தோல்வி அடைந்தது.
ஆண்கள் ஒற்றையர் பிரிவில் நடந்த 2-வது சுற்று ஆட்டம் ஒன்றில் இந்திய வீரர் சினேகித் சுரவஜ்ஜூலா சரிவில் இருந்து மீண்டு 9-11, 15-17, 11-4, 11-6, 18-16 என்ற செட் கணக்கில் ஜப்பானின் மிசுகி ஓகாவாவை வீழ்த்தி 3-வது சுற்றுக்கு முன்னேறினார். மற்றொரு ஆட்டத்தில் இந்திய வீரர் மானவ் தாக்கர் 6-11, 7-11, 11-9, 9-11 என்ற செட் கணக்கில் செக்குடியரசின் லுபோமிர் ஜான்காரிக்கிடம் பணிந்தார்.
பெண்கள் ஒற்றையர் பிரிவில் 2-வது சுற்று ஆட்டங்களில் இந்தியாவின் யாஷினி சிவசங்கர், தனிஷ்கா கல்பாய்ராவ் தோல்வி கண்டு வெளியேறினர்.
