நார்வே செஸ் போட்டி: கார்ல்செனிடம் வீழ்ந்த எரிகைசி

ஸ்டாவஞ்சர்,

நார்வே கிளாசிக்கல் சர்வதேச செஸ் போட்டி அங்குள்ள ஸ்டாவஞ்சர் நகரில் நடந்து வருகிறது. இதில் ஓபன் பிரிவில் நடப்பு உலக சாம்பியன் குகேஷ் (இந்தியா), 5 முறை உலக சாம்பியன் மாக்னஸ் கார்ல்சென் (நார்வே), அர்ஜூன் எரிகைசி (இந்தியா) உள்பட 6 வீரர்கள் பங்கேற்றுள்ளனர். இதில் ஒவ்வொரு வீரரும், மற்றவர்களுடன் தலா 2 முறை மோத வேண்டும்.

இதில் 4-வது சுற்று ஆட்டம் ஒன்றில் இந்திய வீரர் குகேஷ், உலக தரவரிசையில் 3-வது இடத்தில் இருக்கும் பாபியானோ கருனாவை (அமெரிக்கா) சந்தித்தார். 4 மணி நேரம் நீடித்த இந்த ஆட்டம் டிராவில் முடிந்தது. இதைத்தொடர்ந்து வெற்றி, தோல்வியை முடிவு செய்ய நடந்த டைபிரேக்கரில் வெள்ளை நிற காய்களுடன் ஆடிய குகேஷ் 51-வது நகர்த்தலில் பாபியானோ கருனாவுக்கு அதிர்ச்சி அளித்தார்.

குகேஷ் பெற்ற 2-வது வெற்றி இதுவாகும். மற்றொரு ஆட்டத்தில் இந்திய வீரர் அர்ஜூன் எரிகைசி 48-வது காய் நகர்த்தலில் கார்ல்செனிடம் வீழ்ந்தார்.

4-வது சுற்று முடிவில் கார்ல்சென் 8 புள்ளிகளுடன் முதலிடத்திலும், பாபியானோ கருனா 7 புள்ளிகளுடன் 2-வது இடத்திலும், ஹிகாரு நகமுரா (அமெரிக்கா) 5.5 புள்ளியுடன் 3-வது இடத்திலும் உள்ளனர். குகேஷ், அர்ஜூன் எரிகைசி (தலா 4.5 புள்ளி) 4-வது இடத்தை இணைந்து வகிக்கின்றனர். சீனாவின் வெய் யி (4 புள்ளி) கடைசி இடத்தில் உள்ளார்.