விசாகப்பட்டினம்,

புரோ கபடி லீக் போட்டி 2014-ம் ஆண்டு முதல் நடத்தப்பட்டு வருகிறது. இந்த ஆண்டுக்கான 12-வது புரோ கபடி லீக் விசாகப்பட்டினத்தில் கடந்த 28ம் தேதி தொடங்கியது . முதற்கட்ட லீக் ஆட்டங்கள் செப்டம்பர் 11-ந் தேதி வரை விசாகப்பட்டினத்திலும், அடுத்த கட்ட ஆட்டங்கள் முறையே ஜெய்ப்பூர் (செப்.12-27), சென்னை (செப்.29- அக்.10), டெல்லி (அக்.11-23) ஆகிய இடங்களிலும் நடைபெறுகிறது.

இதில் நேற்றிரவு நடந்த ஒரு ஆட்டத்தில் தெலுங்கு டைட்டன்ஸ் 45-37 என்ற புள்ளி கணக்கில் முன்னாள் சாம்பியன் யு மும்பாவை தோற்கடித்து 3-வது வெற்றியை பெற்றது. தெலுங்கு டைட்டன்ஸ் ஆல்-ரவுண்டர் பரத் ஹூடா 13 புள்ளிகள் எடுத்து அணியின் வெற்றியில் முக்கிய பங்கு வகித்தார்.

மற்றொரு ஆட்டத்தில் புனேரி பால்டன் 43-32 என்ற புள்ளி கணக்கில் உ.பி. யோத்தாசை வீழ்த்தி 4-வது வெற்றியை சுவைத்தது. இன்றைய ஆட்டங்களில் யு மும்பா- பாட்னா பைரட்ஸ் (இரவு 8 மணி), தபாங் டெல்லி -குஜராத் ஜெயன்ட்ஸ் (இரவு 9 மணி) அணிகள் சந்திக்கின்றன.