மாற்றுத் திறனாளிகளுக்கான மாநில நீச்சல் போட்டி:- சென்னை அணி 'சாம்பியன்'

சென்னை,

தமிழ்நாடு பாரா ஒலிம்பிக் ஸ்போர்ட்ஸ் சங்கம் சார்பில் மாற்றுத் திறனாளிகளுக்கான 8-வது மாநில சீனியர் மற்றும் 3-வது ஜூனியர், சப்-ஜூனியர் நீச்சல் போட்டி சென்னை வேளச்சேரியில் உள்ள எஸ்.டி.ஏ.டி. நீச்சல் வளாகத்தில் 2 நாட்கள் நடந்தது. இதில் சென்னை மாவட்ட அணி 108 புள்ளிகளுடன் ஒட்டு மொத்த சாம்பியன் பட்டத்தை கைப்பற்றியது.

சேலம் மாவட்ட அணி (102 புள்ளிகள்) 2-வது இடம் பெற்றது. சென்னை நேரு உள்விளையாட்டு அரங்கத்தில் உள்ள மாற்றுத் திறனாளிகளுக்காக பிரத்யேகமாக அமைக்கப்பட்டுள்ள நீச்சல் குளத்தில் எஸ்.டி.ஏ.டி. பயிற்சியாளர் பாண்டியனிடம் பயிற்சி பெற்ற விஷ்ணு வர்தன் 3 தங்கப்பதக்கமும், வி.ஜி.அரவிந்த் ஒரு தங்கம், ஒரு வெள்ளிப்பதக்கமும் (சப்-ஜூனியர் பிரிவு) வென்றனர்.

பரிசளிப்பு விழாவில் ரவுண்ட் டேபிள் அமைப்பின் சென்னை தலைவர் துஷயந்த் மெஹரா, தமிழ்நாடு பாரா ஒலிம்பிக் ஸ்போர்ட்ஸ் சங்க பொதுச்செயலாளர் கிருபாகரன் ராஜா, சென்னை தலைவர் எம்.எஸ்.நாகராஜன் ஆகியோர் கலந்து கொண்டு வெற்றி பெற்றவர்களுக்கு பரிசு வழங்கினர்.