ஹாங்காங்,
ஹாங்காங் டென்னிஸ் ஓபன் தொடரின் பெண்கள் ஒற்றையர் பிரிவு அரையிறுதியில் பிலிப்பைன்ஸ் வீராங்கனை ஈலா, கிரீஸ் நாட்டின் மரியா சக்காரியை வீழ்த்தி இறுதிப்போட்டிக்கு முன்னேறியுள்ளார்.
பரபரப்பாக நடைபெற்ற இந்த அரையிறுதிப் போட்டியில் இருவரும் தொடக்கம் முதலே கடுமையாகப் போராடினர். முதல் செட்டை 7-5 என்ற கணக்கில் ஈலா கைப்பற்றினார். இதற்குப் பதிலடி கொடுத்த சக்காரி, 2-வது செட்டை 6-3 என்ற கணக்கில் வென்றார்.
இதனால் வெற்றியைத் தீர்மானிக்கும் 3-வது செட்டில் இருவருக்கும் இடையே கடும் போட்டி நிலவியது. இதில் சிறப்பாக விளையாடிய ஈலா 6-4 என்ற கணக்கில் செட்டை கைப்பற்றி வெற்றி பெற்றார்.
இதன் மூலம் 7-5, 3-6, 6-4 என்ற செட் கணக்கில் மரியா சக்காரியை வீழ்த்திய அவர், ஹாங்காங் ஓபன் தொடரின் இறுதிப்போட்டிக்கு முன்னேறினார்.
இந்தத் தொடரில் தொடர்ந்து சிறப்பான ஆட்டத்தை வெளிப்படுத்தி வரும் ஈலா, இறுதிப்போட்டியில் அமெரிக்க வீராங்கனை கிளெய்ர் லியூயை எதிர்கொள்கிறார்.
