மொனாக்கோ,
மான்ட்கார்லோ மாஸ்டர்ஸ் டென்னிஸ் போட்டி மொனாக்கோவில் நடந்து வருகிறது. இதில் நேற்று நடந்த ஒற்றையர் 3-வது சுற்று ஆட்டம் ஒன்றில் நம்பர் ஒன் வீரரான நோவக் ஜோகோவிச் (செர்பியா) 4-6, 5-7 என்ற நேர்செட்டில் 33-ம் நிலை வீரரான இங்கிலாந்தின் டேனியல் இவான்சிடம் அதிர்ச்சி தோல்வி கண்டு வெளியேறினார்.
இதன் மூலம் இந்த ஆண்டில் தொடர்ச்சியாக 10 வெற்றிகளை பெற்று இருந்த ஜோகோவிச்சின் வீறுநடை முடிவுக்கு வந்தது. இதேபோல்தரவரிசையில் 6-வது இடத்தில் உள்ள ஜெர்மனி வீரர் அலெக்சாண்டர் ஸ்வெரேவ் 4-6, 6-7 (7-9) என்ற நேர்செட்டில் 15-ம் நிலை வீரரான டேவிட் கோபினிடம் (பெல்ஜியம்) வீழ்ந்தார்.
மற்றொரு ஆட்டத்தில் ஸ்பெயின் வீரர் ரபெல் நடால் 6-1, 6-1 என்ற நேர்செட்டில் டிமிட்ரோவை (பல்கேரியா) விரட்டினார்.