மாநில பெண்கள் ஆக்கி - இறுதிப்போட்டியில் சென்னை அணி

சென்னை,

தமிழ்நாடு ஆக்கி சங்கம் சார்பில் மாவட்டங்களுக்கு இடையிலான மாநில பெண்கள் ஆக்கி போட்டி சென்னை எழும்பூரில் உள்ள மேயர் ராதாகிருஷ்ணன் ஸ்டேடியத்தில் நடந்து வருகிறது. இதில் 2-வது நாளான நேற்று நடந்த அரைஇறுதி ஆட்டம் ஒன்றில் சென்னை அணி 4-1 என்ற கோல் கணக்கில் திருப்பூரை வீழ்த்தி இறுதிப்போட்டிக்குள் நுழைந்தது. மற்றொரு அரைஇறுதி ஆட்டத்தில் ஈரோடு அணி 8-0 என்ற கோல் கணக்கில் திருநெல்வேலியை தோற்கடித்து இறுதிப்போட்டிக்கு முன்னேறியது. இன்று காலை 9.30 மணிக்கு நடைபெறும் இறுதிப்போட்டியில் சென்னை-ஈரோடு அணிகள் பலப்பரீட்சை நடத்துகின்றன. முன்னதாக நடைபெறும் 3-வது இடத்துக்கான ஆட்டத்தில் திருப்பூர்-திருநெல்வேலி அணிகள் சந்திக்கின்றன.