பள்ளி மாணவ-மாணவிகள் பயன்பெறும் வகையில் தமிழக அரசு விலையில்லா சைக்கிளை வழங்கி வருகிறது. இந்த திட்டத்தின்படி பிளஸ்-1 படித்து வரும் அனைத்து மாணவ-மாணவிகளுக்கும் விலையில்லா சைக்கிள் வழங்கப்படுகிறது. ஆனால் கடந்த கல்வி ஆண்டில் மாணவர்களுக்கு இலவச சைக்கிள் வழங்கப்படவில்லை.

இதையடுத்து இந்த ஆண்டு பிளஸ்-1 படித்து வரும் மாணவர்களுக்கும், கடந்த ஆண்டு பிளஸ்-1 படித்து விட்டு தற்போது பிளஸ்-2 படித்து வரும் மாணவர்களுக்கும் விலையில்லா சைக்கிள் வழங்குவதற்கான ஆயத்த பணிகள் நடைபெற்று வருகிறது. இந்த திட்டத்தின்படி கடலூர் மாவட்டத்தில் பிளஸ்-1, பிளஸ்-2 படித்து வரும் 18 ஆயிரத்து 216 மாணவிகள், 23 ஆயிரத்து 967 மாணவர்கள் என மொத்தம் 42 ஆயிரத்து 183 பேருக்கு விலையில்லா சைக்கிள் வழங்கப்படுகிறது.