தஞ்சாவூர்,

தூத்துக்குடியில் ஸ்டெர்லைட் ஆலையை நிரந்தரமாக மூட வலியுறுத்தி போராட்டம் நடத்தியவர்கள் மீது போலீசார் துப்பாக்கி சூடு நடத்தியதில் 13 பேர் பலியானார்கள். இந்த சம்பவத்தை கண்டித்து தமிழகம் முழுவதும் பல்வேறு அரசியல் கட்சியினர், தமிழ் அமைப்புகள், மாணவர்கள் போராட்டம் நடத்தி வருகின்றனர். இந்தநிலையில் துப்பாக்கி சூடு சம்பவத்தை கண்டித்தும், முதல்-அமைச்சர் எடப்பாடி பழனிசாமி, டி.ஜி.பி. ராஜேந்திரன் ஆகியோர் பதவி விலக வலியுறுத்தியும் தமிழகத்தில் முழு அடைப்பு போராட்டம் நடைபெறும் என தி.மு.க. செயல் தலைவர் மு.க.ஸ்டாலின் அறிவித்திருந்தார்.

ஆனால் தஞ்சை மாவட்டத்தில் நேற்று அரசு பஸ்கள், தனியார் பஸ்கள், மினி பஸ்கள், ஷேர் ஆட்டோக்கள், ஆட்டோக்கள் எல்லாம் வழக்கம்போல் ஓடின. இதனால் பொதுமக்களின் இயல்பு வாழ்க்கை எதுவும் பாதிக்கப்படவில்லை. தஞ்சை காந்திஜிசாலை, அண்ணாசாலை, பழைய பஸ் நிலையம், தெற்குஅலங்கம், தெற்குவீதியில் ஓரிரு கடைகள் மட்டுமே அடைக்கப்பட்டு இருந்தன. மற்ற கடைகள் அனைத்தும் வழக்கம்போல் திறக்கப் பட்டன.

அண்ணாசாலை, காந்திஜிசாலை, ராசாமிராசுதார் அரசு மருத்துவமனை சாலை ஆகியவற்றில் உள்ள கடைகளை அடைக்கும் படி சிலர் கடை உரிமையாளர்களிடம் வலிறுத்தினர். இதனால் இந்த சாலைகளில் திறக்கப்பட்ட கடைகள் அனைத்தும் அடைக்கப்பட்டன. கடைக்கு வேலைக்கு வந்த ஊழியர்கள் அனைவரும் கடை வாசலில் காத்திருந்தனர். மதியம் 12.30 மணிக்கு மேல் மீண்டும் அனைத்து கடைகளும் திறக்கப்பட்டு வியாபாரம் நடைபெற்றது. இதனால் கடையடைப்பு போராட்டமும் பெரிய அளவில் பாதிப்பை ஏற்படுத்தவில்லை.

இந்தநிலையில் தி.மு.க. கூட்டணி கட்சியினர் தஞ்சை பழைய பஸ் நிலையம் முன்பு சாலை மறியலில் ஈடுபட்டனர். இதற்கு தஞ்சை தெற்கு மாவட்ட தி.மு.க. செயலாளர் துரை.சந்திரசேகரன் எம்.எல்.ஏ. தலைமை தாங்கினார். உயர்நிலை செயல்திட்டக்குழு உறுப்பினரும், முன்னாள் மத்தியமந்திரியுமான டி.ஆர்.பாலு, ஒரத்தநாடு தொகுதி எம்.எல்.ஏ. ராமச்சந்திரன் ஆகியோர் முன்னிலை வகித்தனர்.

இதில் முன்னாள் மாவட்ட தி.மு.க. பொறுப்பாளர் து.செல்வம், மாநகர செயலாளர் நீலமேகம், முன்னாள் நகரசபை தலைவர் இறைவன், மாவட்ட இளைஞரணி அமைப்பாளர் சண்.ராமநாதன், மார்க்சிஸ்ட் கம்யூனிஸ்டு கட்சி மாவட்ட செயலாளர் நீலமேகம், செயற்குழு உறுப்பினர் செந்தில்குமார், இந்திய கம்யூனிஸ்டு கட்சி மாவட்ட செயலாளர் பாரதி, ஏ.ஐ.டி.யூ.சி. மாநில செயலாளர் சந்திரகுமார், மாநகர மாவட்ட காங்கிரஸ் கட்சி பொருளாளர் பழனியப்பன், ம.தி.மு.க. மாவட்ட செயலாளர் உதயகுமார், விடுதலை சிறுத்தைகள் கட்சி மாவட்ட செயலாளர் சொக்கா.ரவி மற்றும் பலர் கலந்து கொண்டு துப்பாக்கி சூடு சம்பவத்திற்கு பொறுப்பேற்று முதல்-அமைச்சர் எடப்பாடி பழனிசாமி பதவி விலக கோரியும், ஸ்டெர்லைட் ஆலையை நிரந்தரமாக மூடக் கோரியும் கோஷங்கள் எழுப்பினர்.

இந்த சாலை மறியலால் பழைய பஸ் நிலையத்தில் இருந்து பஸ்கள் வெளியே வர முடியவில்லை. இதனால் 15 நிமிடம் போக்குவரத்து பாதிக்கப்பட்டது. உடனே கூடுதல் போலீஸ் சூப்பிரண்டு ரெத்தினவேலு, துணை போலீஸ் சூப்பிரண்டுகள் ஜெயச்சந்திரன், ஜெயசீலன் மற்றும் போலீசார் வந்து சாலை மறியலில் ஈடுபட்டவர்களை கைது செய்து வேனில் ஏற்றி சென்றனர். மொத்தம் 2 எம்.எல்.ஏ.க்கள் உள்பட 100 பேர் கைது செய்யப்பட்டனர்.