திருமானூர்,

அரியலூர் மாவட்டம் கீழப்பழுவூர் அருகே உள்ள கீழை யூரில் நேற்று ஜல்லிக்கட்டு போட்டி நடைபெற்றது. இதையொட்டி மாரியம்மன் கோவில் அருகே வாடிவாசல் அமைக்கப்பட்டது. முதலில் காளைகளுக்கு மருத்துவ பரிசோதனை நடைபெற்றது. அதைத்தொடர்ந்து வாடிவாசலில் இருந்து அலங்கரிக்கப்பட்ட காளைகள் ஒவ்வொன்றாக அவிழ்த்து விடப்பட்டன.

இதில் 150-க்கும் மேற்பட்ட மாடுபிடி வீரர்கள் கலந்து கொண்டு சீறிப்பாய்ந்து வந்த காளைகளை போட்டி போட்டு அடக்கினர். அப்போது பொதுமக்கள் கைதட்டி ஆரவாரம் செய்தனர். சில காளைகள் வீரர்களை தூக்கி வீசி பந்தாடியது. இதில் தஞ்சை, திருச்சி, அரியலூர், பெரம்பலூர், ஜெயங்கொண்டம், திருமானூர் உள்ளிட்ட இடங்களில் இருந்து வந்திருந்த 300-க்கும் மேற்பட்ட காளைகள் அவிழ்த்து விடப் பட்டன.

25 பேர் காயம்

காளைகள் முட்டியதில் மலத்தான்குளத்தை சேர்ந்த தங்க பிரகாசம் (வயது 45), செல்லத்துரை (38), ஒரத்தூர் பகுதியை சேர்ந்த செந்தில் (37), பூண்டியை சேர்ந்த தெய்வசிகாமணி (30), மேலப்பழுவூரை சேர்ந்த முத்துசாமி (60) உள்பட 25 பேர் காயம் அடைந்தனர். அவர்களுக்கு அங்கிருந்த மருத்துவக்குழுவினரால் சிகிச்சை அளிக்கப்பட்டது. மேலும் செல்லத்துரை உள்பட 5 பேர் மேல் சிகிச்சைக்காக தஞ்சை மருத்துவக்கல்லூரி மருத்துவ மனைக்கு அனுப்பி வைக்கப் பட்டனர்.

பரிசு பொருட்கள்

ஜல்லிக்கட்டு போட்டியில் காளைகளை அடக்கிய வீரர் களுக்கு விழா குழுவினரால் தங்கம், வெள்ளி நாணயங்கள், சில்வர் பாத்திரங்கள், கட்டில், பீரோ, வேட்டி, ரூ.5 ஆயிரம் வரையிலான பணமுடிப்பு போன்ற பரிசு பொருட்கள் வழங்கப்பட்டன.

இதேபோல் வீரர்களிடம் பிடிபடாத காளைகளின் உரிமையாளர்களுக்கும் பரிசு பொருட்கள் வழங்கப் பட்டது.

இதில் தஞ்சை, திருச்சி, பெரம்பலூர், அரியலூர், ஜெயங்கொண்டம், திருமானூர் உள்ளிட்ட பகுதிகளை சேர்ந்த திரளான பொதுமக்கள் கலந்து கொண்டு போட்டியை கண்டு களித்தனர். ஜல்லிக்கட்டு போட்டிக்கான ஏற்பாடுகளை விழாக்குழுவினர் மற்றும் கீழையூர் பொதுமக்கள் செய்திருந்தனர்.