மும்பை,

லாரி உரிமையாளர்கள் தங்கள் கோரிக்கைகளை வலியுறுத்தி நாடு முழுவதும் 4-வது நாளாக வேலை நிறுத்த போராட்டத்தில் ஈடுபட்டு உள்ளனர். மராட்டியத்தில் மட்டும் சுமார் 10 லட்சம் சரக்கு வாகனங்கள் வேலை நிறுத்தப்போராட்டத்தில் ஈடுபட்டுள்ளதாக கூறப்படுகிறது.

இதன் காரணமாக சரக்குகள் தேக்கம் அடைந்து உள்ளன. சந்தைகளுக்கு காய்கறிகளின் வரத்து வெகுவாக குறைந்து உள்ளது. ரூ.8 ஆயிரம் கோடி வரை வர்த்தகம் பாதிக்கப்பட்டு உள்ளது.

அரசு லாரி உரிமையாளர்களுடன் எந்த பேச்சுவார்த்தையிலும் ஈடுபடாததால் இந்த போராட்டம் தொடரும் என கூறப்படுகிறது. இதனால் மும்பையில் காய்கறி, பழங்கள் போன்ற அத்தியாவசிய பொருட்களுக்கு தட்டுபாடு ஏற்படும் அபாயம் ஏற்பட்டுள்ளது.

இந்தநிலையில் நேற்று முன்தினம் நள்ளிரவு மர்ம ஆசாமிகள் சிலர் தலோஜா தொழிற்பேட்டை பகுதியில் நிறுத்தி வைக்கப்பட்டு இருந்த லாரிகளின் கண்ணாடிகளை அடித்து உடைத்துள்ளனர். இதில் 12 லாரிகள் சேதமடைந்தன. இந்தநிலையில் காலை டிரைவர்கள் லாரிகள் சேதமடைந்து இருப்பதை பார்த்து அதிர்ச்சி அடைந்தனர்.

இந்த சம்பவம் குறித்து அவர்கள் தலோஜா போலீசில் புகார் அளித்தனர். போலீசார் வழக்குப்பதிவு செய்து லாரிகளை சேதப்படுத்திய மர்ம ஆசாமிகளை தேடி வருகின்றனர்.