சுமார் 120 ஆண்டுகால வரலாற்றுத் தகவல்களை ஆய்வுக்கு உட்படுத்தியுள்ள இந்த முக்கியமான ஆய்வின் முடிவுகள் அதிக எண்ணிக்கையிலான மனிதர்கள் அதிகபட்ச வயது வரை வாழ்வார்கள் என்றாலும், அதிகபட்ச வயது வரம்பு என்பது ஒரு குறிப்பிட்ட அளவைத்தாண்டாது என்று கூறுகின்றன.

உதாரணமாக, சமீபத்தில் வெளியான நெதர்லாந்து நாட்டு ஆய்வு ஒன்று, அதிகபட்ச மனித ஆயுள் 115 வயதைத் தாண்டாது என்று கண்டறிந்தது குறிப்பிடத்தக்கது.

முக்கியமாக, அளவில் பெரிய மூளை, அதிகபட்ச உயரம், ஆயுட்காலம் மற்றும் உடல்தகுதி ஆகிய நவீனகால மனித திறன்களுக்கு பல மில்லியன் ஆண்டுகால பரிணாமக்காரணிகள் தான் அடிப்படை என்கிறது பிரான்ஸ் நாட்டில் உள்ள பாரிஸ் டெஸ்கார்டெஸ் பல்கலைக்கழகத்தில் மேற்கொள்ளப்பட்ட இந்த ஆய்வு.

மேலும், மனித வாழ்க்கை காரணமாக சுற்றுச்சூழலில் ஏற்படும் பாதிப்புகளுடன் இணையும்போது அதிகபட்ச மனித வயது மற்றும் திறன்கள் ஆகியவை குறையக்கூடும் என்கிறார்கள் ஆய்வாளர்கள் ஷான் பிரான்காய்ஸ் டூசெயின்ட் மற்றும் ஏட்ரியன் மார்க் ஆகியோர்.

இது ஒருபுறமிருக்க, மனிதர்கள் 200 முதல் 500 ஆண்டுகள் அல்லது அதற்கும் அதிகமான வயது வரை வாழ்வார்கள் எனும் கருத்தை முன்வைக்கும் ஆய்வுகள் வெறும் கணிதக் கணிப்புகளை அடிப்படையாகக்கொண்டும், ஆனால் அதேசமயம் மனித மற்றும் சுற்றுச்சூழல் ஆகிய இரண்டுக்கும் இடையிலான தொடர்புகள் மற்றும் இடைவினைகளைக் கருத்தில் கொள்ளாமலும் மேற்கொள்ளப்படுகின்றன என்கிறார்கள் டூசெயிண்டும், மார்க்கும்.

ஆனால், கிறிஸ்பர் உள்ளிட்ட நவீன மரபணுத் திருத்த தொழில்நுட்ப அடிப்படையில் மனித மூப்படைதலை ஏற்படுத்தும் மரபணுக்களை நீக்கும் அல்லது குணப்படுத்தும் சில மருத்துவ முயற்சிகள் நல்ல பலனை அளித்திருப்பது உண்மைதான். என்றாலும், அத்தகைய தொழில்நுட்பங்கள் ஏற்படுத்தும் பின்விளைவுகள் மற்றும் ஆபத்துகள் குறித்த தெளிவான புரிதல் இன்னும் ஏற்படவில்லை என்பதே எதார்த்தம்.

எவ்வளவு நவீனமான தொழில்நுட்பம் வந்தாலும், அதீத உயரம், ஆயுட்காலம் மற்றும் உடல்தகுதிகள் கொண்ட மனிதன் 3.0 அல்லது 4.0 (Homo sapiens 3.0 or 4.0) உள்ளிட்ட நவீன மனித இனங்கள் தோன்றினாலும் கூட அவற்றின் திறன்களும் ஒரு கட்டத்தில் சமநிலை அடைந்தே தீரும் என்கிறார்கள் டூசெயிண்டும், மார்க்கும். உதாரணமாக, மரங்கள் எவ்வளவு உயரமாக வளர்ந்தபோதும் விண்ணைத் தொடுவதில்லையே என்கிறார்கள்.