நேற்று காலை மதுரையில் மந்தமான வானிலை நிலவியது. பின்னர் மதியம் சுமார் 12.45 மணியளவில் சாரல் மழை பெய்யத்தொடங்கியது. இந்த சாரல் இரவு 9 மணி வரை நீடித்தது. இரவு 9 மணிக்கு பின்னர் கனமழை பெய்யத்தொடங்கியது.

இந்த கனமழையானது இரவு 10.30 மணி வரை நீடித்தது. ஆனாலும், விடிய விடிய சாரல்மழை பெய்து கொண்டிருந்தது. இதேபோல் விருதுநகர் மாவட்டத்திலும் கடந்த 4 நாட்களாக மழை பெய்து வருகிறது. நேற்றும் மதியம் முதல் நள்ளிரவு வரையிலும் மழை நீடித்தது.

சிவகங்கை

சிவகங்கை மாவட்டத்தில் காரைக்குடி, சிவகங்கை, தேவகோட்டை, மானாமதுரை பகுதியில் தொடர்ந்து மழை பெய்து வருகிறது. இதன்காரணமாக கண்மாய்கள், நீர்நிலைகள் நிரம்பி தண்ணீர் வரத்துக்கால்வாய் வழியாக மறுகால் பாய்கிறது. வயல்களில் தண்ணீர் தேங்கி உள்ளதால் பயிர்கள் நீரில் மூழ்கி சேதமடைந்துள்ளன.

ராமநாதபுரம் மாவட்டத்திலும் ராமேசுவரம், ராமநாதபுரம், பரமக்குடி உள்ளிட்ட பகுதிகளில் தொடர்ந்து மழை பெய்து வருகிறது. ராமநாதபுரத்தில் மழையால் தாழ்வான பகுதிகளில் தண்ணீர் தேங்கி உள்ளது. சாலையில் மரங்கள் சாய்ந்து போக்குவரத்து பாதிக்கப்பட்டது. மழைக்கு பழைய கட்டிடங்கள் சேதம் அடைந்துள்ளன. கண்மாய் உள்ளிட்ட நீர்நிலைகள் நிரம்பி வருகின்றன. தொடர் மழை காரணமாக பயிர்கள் நீரில் மூழ்கியுள்ளன. பொதுவாக தற்போது பெய்து வரும் தொடர் மழையால் பொதுமக்களின் இயல்பு வாழ்க்கை பாதிக்கப்பட்டுள்ளது. மழையால் நேற்று பொங்கல் பொருட்கள் விற்பனையில் மந்த நிலையே காணப்பட்டது.