திருவெண்ணெய்நல்லூர் அருகே அரசூர் கிராமத்தில் 5 ஆயிரத்துக்கும் மேற்பட்ட மக்கள் வசித்து வருகின்றனர். இந்த கிராமத்தில் உள்ள திரவுபதியம்மன் கோவில் தெருவில் சாலை வசதி செய்து கொடுக்கப்படாததால் பல ஆண்டுகளாக மண் சாலையாகவே உள்ளது. மழைக்காலங்களில் இந்த சாலை சேறும், சகதியுமாக வயல்வெளி போன்று மாறிவிடுகிறது.

இதனால் அப்பகுதியை சேர்ந்த குழந்தைகள் மற்றும் பொதுமக்கள் சேற்றில் நடந்து செல்லும் அவல நிலை இருந்து வருகிறது. மேலும் அப்பகுதியில் தேங்கியுள்ள கழிவுநீரினால் சுகாதார சீர்கேடாக உள்ளதால் பலவித தொற்றுநோய் பரவும் அபாயமும் உள்ளது. எனவே இப்பகுதியில் உடனடியாக சாலை வசதி செய்து தர வேண்டும் என சம்பந்தப்பட்ட அதிகாரிகளிடம் பலமுறை பொதுமக்கள் கோரிக்கை வைத்தனர். இருப்பினும் இதுநாள் வரையிலும் சாலை வசதி செய்து தரப்படவில்லை.