சேலம் மாவட்டம் ஆத்தூர் பஸ் நிலையத்தில் இருந்து நேற்று முன்தினம் இரவு சேலத்திற்கு அரசு பஸ் புறப்பட்டது. பஸ்சில் 30க்கும் மேற்பட்ட பயணிகள் இருந்தனர். சேலம் புதிய பஸ் நிலையத்திற்கு இந்த பஸ் இரவு 11.45 மணிக்கு வந்தடைந்தது. பின்னர், பயணிகள் அனைவரும் பஸ்சில் இருந்து கீழே இறங்கினர். சிறிது நேரத்துக்குப்பின் பஸ்சின் கடைசி இருக்கையில் பெரிய டிராவல் பேக் ஒன்று இருந்ததை கண்டக்டர் பார்த்தார். பிறகு அவர் இதுபற்றி டிரைவரிடம் தெரிவித்தார்.

பயணிகள் யாராவது அந்த பேக்கை மறந்து வைத்துவிட்டு சென்றிருக்கலாம் என 2 பேரும் நினைத்தனர். இது தொடர்பாக அவர்கள் பள்ளப்பட்டி போலீஸ் நிலையத்திற்கு தகவல் தெரிவித்தனர். இதையடுத்து போலீசார் பஸ் நிலையத்திற்கு வந்து அந்த பேக்கில் என்ன இருக்கிறது? என சோதனையிட்டனர். அப்போது, அதில் பயங்கர வெடிப்பொருட்களான 100 டெட்டனேட்டர், 90 ஜெலட்டின் குச்சிகள் இருப்பதை கண்டு போலீசார் அதிர்ச்சி அடைந்தனர். இதுபற்றி தகவல் பரவியதால் பஸ் நிலையத்தில் பரபரப்பு ஏற்பட்டது.