ராமநாதபுரம் யானைக்கல்வீதி பகுதியை சேர்ந்தவர் கிருஷ்ணன் என்பவரின் மகன் ரெங்கராஜன் (வயது 35). மசாலா பொருட்கள் உள்ளிட்ட பல நிறுவன ஏஜென்சி எடுத்து நடத்தி வருகிறார். இவர் தனது மனைவி மீனாட்சி மற்றும் குழந்தைகளுடன் திருச்சியில் நடைபெற்ற திருமண நிகழ்ச்சிக்கு சென்றுள்ளார். இந்நிலையில் வீட்டில் யாரும் இல்லாததை நோட்டமிட்ட மர்ம நபர்கள் கதவை உடைத்து உள்ளே புகுந்தனர்.

பின்னர் அவர்கள் பீரோவை திறந்து அதன் உள்ளே இருந்த ரூ. 1 லட்சத்து 60 ஆயிரம், ஒரு பவுன் மோதிரம் முதலியவற்றை திருடிக்கொண்டு தப்பி சென்றுவிட்டனர். இதற்கிடையே வீட்டிற்கு வந்த ரெங்கராஜன் பீரோ திறக்கப்பட்டு நகை, பணம் திருடு போயிருப்பதை கண்டு அதிர்ச்சி அடைந்தார். மேலும் அவர் இதுகுறித்து போலீசாருக்கு தகவல் தெரிவித்தார். அதன்பேரில் ராமநாதபுரம் உதவி போலீஸ் சூப்பிரண்டு அரவிந்த், துணை போலீஸ் சூப்பிரண்டு வெள்ளைத்துரை ஆகியோர் தலைமையில் போலீசார் விரைந்து வந்து விசாரணை மேற்கொண்டனர்.